1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

بون جووی:جرمنوں کے لئے اعزاز کا اجراء

امریکی رَوک گلوکار جون بون جووی نے سماجی سرگرمیوں میں نمایاں کارکردگی دکھانے والے جرمن باشندوں کے لئے ایک اعزاز جاری کیا ہے، جو پہلی مرتبہ ابھی دسمبر کے مہینے میں دیا جائے گا۔

default

جون بون جووی نے نومبر میں دیوارِ برلن کے انہدام کی بیس ویں سالگرہ کی تقریبات میں شرکت کی تھی۔ اِس موقع پر جرمن باشندوں کے باہمی اظہارِ یک جہتی نے جون بون جووی کو اتنا متاثر کیا کہ اُنہوں نے غیر معمولی اخلاقی جرات کا مظاہرہ کرنے والے اور سماجی شعبے میں نمایاں کارنامے انجام دینے والے جرمن باشندوں کے لئے ’’سرکل آف چینج ایوارڈ‘‘ کے نام سے ایک اعزاز جاری کرنے کا فیصلہ کیا ہے۔

BdT Feier am Brandenburger Tor Berlin

دیوار برلن کے انہدام کا بیسواں سالانہ جشن

لندن میں بون جووی کے ریکارڈ جاری کرنے والی کمپنی یونیورسل میوزک نے جمعرات چھبیس نومبر کو جرمن خبر رساں ادارے ڈی پی اے کو بتایا کہ پہلا ایسا ایوارڈ اِسی سال دسمبر کے مہینے میں کسی ایسے جرمن شہری کو دیا جائے گا، جس نے اپنی خدمات اپنے ساتھی انسانوں کے لئے وقف کی ہوں گی۔ جرمن باشندوں سے کہا گیا ہے کہ وہ انٹرنیٹ سائیٹ بون جووی ڈاٹ ڈی ای پر جا کر خود کو یا اپنی پسند کی کسی ہم وطن شخصیت کو نامزد کر سکتے ہیں۔

ایوارڈ جیتنے والے کا انتخاب خود یہ گلوکار کرے گا اور ایوارڈ جیتنے والے کو یہ ٹرافی وصول کرنے کے لئے امریکہ کے سفر کی خصوصی دعوت بھی دی جائے گی۔ ایک نجی جرمن ٹی وی چینل اِس تقریب کی کارروائی دکھائے گا۔

نومبر میں برلن میں جون بون جووی نے اپنے رَوک بینڈ کے ہمراہ اپنا تازہ ترین سنگل گیت We weren't born to follow پیش کیا تھا، جو اب ایک طرح سے آزادی کے ایک ترانے کی حیثیت اختیار کر گیا ہے۔

Live Earth Bildgalerie USA Bon Jovi

اِس بینڈ کے سینتالیس سالہ لِیڈ گلوکار جون بون جووی نے کہا کہ اپنے اِس گیت کے ذریعے وہ استحصال کے شکار انسانوں کے جذبات کی عکاسی کرنا اور دکھانا چاہتے ہیں کہ عوام کتنے طاقتور ہوتے ہیں۔ جون بون جووی کے مطابق موسیقی سرحدیں اور زبان کی رکاوٹیں عبور کر کے انسانوں کو ایک دوسرے کے قریب لانے کی صلاحیت رکھتی ہے۔

امریکی ریاست نیو جرسی میں اَسی کے عشرے کےاوائل میں قائم ہونے والے اِس بینڈ کے گیتوں کے اب تک ایک سو بیس ملین سے زیادہ ریکارڈ فروخت ہو چکے ہیں۔ گزشتہ پچیس برسوں میں دنیا کے کامیاب ترین رَوک بینڈ کی حیثیت اختیار کر جانے والا یہ بینڈ دُنیا کے پچاس ممالک میں چھبیس سو کنسرٹس میں چونتیس ملین شائقین کے سامنے اپنے فن کا مظاہرہ کر چکا ہے۔

رپورٹ امجد علی

ادارت شادی خان سیف