1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

بن لادن آپریشن، ’سرنگ کھودنا بھی زیر غور تھا‘

امریکی اخبار نیویارکر میں شائع ہونے والی ایک رپورٹ میں دعویٰ کیا گیا ہے کہ پاکستانی علاقے ایبٹ آباد میں اسامہ بن لادن کے ٹھکانے پر خفیہ کمانڈو ایکشن کے لیے ہیلی کاپٹروں کی بجائے زمین دوز راستے پر زیادہ غور کیا گیا تھا۔

default

دہشت گرد تنظیم القاعدہ کے سربراہ اسامہ بن لادن کے خلاف رواں برس مئی کے آغاز میں انتہائی خفیہ آپریشن کی منصوبہ بندی کرنے والے کمانڈروں کے پیش نظر سرنگ کے ذریعے اسامہ بن لادن کی رہائش گاہ تک پہنچنا اس لیے رہا تاکہ پاکستانی فوج کی جانب سے کسی ممکنہ کارروائی سے بچا جا سکے۔ اخبار کے مطابق امریکی کمانڈروں کا ارادہ تھا کہ ایبٹ آباد کے قریب کسی علاقے سے اسامہ بن لادن کے ٹھکانے تک ایک طویل سرنگ کھودی جائے، جس کے ذریعے امریکی کمانڈوز چپکے سے اس مکان میں داخل ہو کر اسامہ بن لادن کو ہلاک کر کے واپس بھی لوٹ جائیں اور پاکستانی فوج کو اس پورے آپریشن کا علم ہی نہ ہو پائے۔

رپورٹ میں یہ بھی بتایا گیا ہے کہ اس آپریشن کے منصوبہ ساز ان امکانات پر بھی غور کر رہے تھے کہ شاید اسامہ بن لادن کے اس ٹھکانے میں کوئی خفیہ سرنگ موجود ہو، جس کے ذریعے بن لادن اس مکان سے ممکنہ طور پر فرار ہونے کی کوشش کریں۔

رپورٹ کے مطابق اس علاقے کی زمینی سطح میں پانی کی وافر مقدار میں موجودگی کی وجہ سے سرنگ کی تجویز کو منسوخ کیا گیا۔

Haus Osama Bin Laden

ایبٹ آباد میں اسامہ بن لادن کا ٹھکانہ

رپورٹ میں بتایا گیا ہے کہ اسامہ بن لادن کی ہلاکت کے لیے بمبار طیارے کے استعمال کی تجویز بھی پیش کی گئی تھی۔ رپورٹ کے مطابق اس وقت کے وزیردفاع رابرٹ گیٹس نے کمانڈوز کو اس مکان پر اتارنے سے زیادہ بمبار طیارے کے استعمال کی حمایت کی تھی۔

رپورٹ میں سابق وائس چیئرمین جوائنٹ چیفس آف سٹاف جیمس کارٹ رائٹ کےحوالے سے کہا گیا ہےکہ اس تجویز کو اس لیے رد کر دیا گیا تھا کیونکہ کمانڈروں کے مطابق اس مکان میں ممکنہ طور پر موجود تہہ خانوں کو تباہ کرنے کے لیے شدید نوعیت کی بمباری کی ضرورت پڑتی، جو ایبٹ آباد کے رہائشیوں کے لیے کسی زلزلے سے کم ہرگز نہ ہوتی۔

اس اخباری رپورٹ میں کہا گیا ہے کہ امریکی صدر باراک اوباما نے تمام تجاویز جاننے کے بعد ہیلی کاپٹروں کے ذریعے کمانڈوز کو اسامہ بن لادن کے مکان پر اتارنے کے منصوبے کی حمایت کرتے ہوئے اس پر عمل درآمد کی ہدایات دی تھیں۔

رپورٹ : عاطف توقیر

ادارت : امجد علی

DW.COM

ویب لنکس