1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنگلہ دیشی ٹی ٹوئنٹی لیگ، پاکستانی کھلاڑیوں کو اجازت نہ ملی

پاکستانی کرکٹرز کو بنگلہ دیش میں ہونے والے پرکشش ٹی ٹوئنٹی لیگ مقابلوں میں شرکت کی اجازت نہیں ملی تاکہ وہ اگلے مہینے انگلینڈ کے خلاف دبئی اور ابو ظہبی میں ہونے والی ٹیسٹ سیریز پر توجہ مرکوز کر سکیں۔

default

کراچی سے ملنے والی رپورٹوں کے مطابق بنگلہ دیش میں26 دسمبر کو شروع ہونے والی اس پریمیئر لیگ میں کھیلنے کے لیے نو پاکستانی کھلاڑیوں کو معاہدوں کی پیشکش ہوئی تھی تاہم پاکستان کرکٹ بورڈ نے ان میں سے ٹیسٹ میچ کھیلنے والے کئی کھلاڑیوں کو بنگلہ دیشی ٹوئنٹی ٹوئنٹی لیگ میں شرکت کی اجازت دینے سے انکار کر دیا ہے۔

جن پاکستانی ٹیسٹ کھلاڑیوں کو اس پریمیئر لیگ میں حصہ لینے کی اجازت نہیں ملی، ان میں یونس خان، شعیب ملک، عمران فرحت، محمد حفیظ اور عبدالرحمٰن شامل ہیں۔ خبر ایجنسی روئٹرز کے مطابق پاکستان کرکٹ بورڈ کے میڈیا مینیجر ندیم سرور کے بقول پی سی بی کے انکار کی وجہ پاکستانی ٹیم کا آئندہ ٹیسٹ شیڈول ہے۔

Younis Khan Kapitän der pakistanischen Cricket Nationalmannschaft

یونس خان کو بھی بنگلہ دیشی پریمیئر لیگ میں شمولیت کی اجازت نہیں ملی

ندیم سرور نے کہا،’ پی سی بی کی رائے میں ایک ایسے وقت پر جب پاکستانی ٹیم انگلینڈ کے خلاف متحدہ عرب امارات میں ایک اہم ٹیسٹ سیریز کھیلنے والی ہے، یہ بات مناسب نہیں کہ قومی ٹیم کے سرکردہ ٹیسٹ کھلاڑیوں کو کسی دوسرے ملک کی ٹی ٹوئنٹی لیگ میں کھیلنے کی اجازت دے دی جائے۔‘

پی سی بی کے میڈیا مینیجر نے کہا کہ فی الحال اس مرحلے پر کسی بھی پاکستانی کھلاڑی کو بنگلہ دیشی لیگ کے لیے معاہدے پر دستخط کرنے کی اجازت نہیں دی گئی۔

Shoaib Malik

پاکستانی کرکٹرشعیب ملک

جن دیگر پاکستانی کھلاڑیوں کو بنگلہ دیش میں مختلف کلبوں کی طرف سے اسی لیگ کے لیے معاہدوں کی پیشکش کی گئی تھی، ان میں کامران اکمل کے علاوہ وہاب ریاض، عمر اکمل اورسہیل تنویر بھی شامل ہیں۔

ان میں سے کم ازکم دو کھلاڑیوں نے ابھی حال ہی میں سری لنکا اور بنگلہ دیش کے خلاف ون ڈے سیریز میں بھی حصہ لیا تھا۔ پاکستانی ٹیم اس وقت بنگلہ دیش کا دورہ کر رہی ہے، جہاں وہ ان دنوں دو ٹیسٹ میچوں کی سیریز کا دوسرا اور آخری میچ کھیل رہی ہے۔ پاکستانی قومی کرکٹ ٹیم اگلے ہفتے بنگلہ دیش سے واپس وطن لوٹے گی۔

نو جنوری کو پاکستانی ٹیم کو دبئی روانہ ہونا ہے۔ انگلینڈ کے خلاف تین ٹیسٹ میچوں کی سیریز کا پہلا میچ سترہ جنوری کو شروع ہو گا۔ اس دورے کے لیے پاکستانی اسکوڈ میں شامل کھلاڑیوں کے ناموں کا اعلان اگلے ہفتے کیا جائے گا۔

رپورٹ: عصمت جبیں

ادارت: امتیاز احمد

DW.COM