1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا: ہوفن ہائم کی جیت

بنڈس لیگا یا جرمن وفاقی فٹ بال لیگ کے تیسرے میچ ڈے کے سلسلے میں کھیلے گئے پہلے میچ میں ہوفن ہائم شالکے کو دو صفر سے شکست دے کر اپنی جیت کا سلسلہ برقرار رکھنے میں کامیاب ہو گیا ہے۔

default

Isaac Vorsah گول کرنے کے بعد

جمعہ کے دن ہوفن ہائم کے ہوم گراؤنڈ رائن نیکار ایرینا میں کھیلے گئے اس میچ میں جہاں بنڈس لیگا کے رواں سیزن میں میزبان ٹیم کو مسلسل تیسری کامیابی ملی، وہیں شالکے کلب کی یہ تیسری مسلسل ناکامی بھی ثابت ہوئی۔

اس میچ کے37 ویں منٹ میں گھانا سے تعلق رکھنے والے شالکے کے دفاعی کھلاڑی Isaac Vorsah نے گول کیا جبکہ 92 ویں منٹ میں شالکے کے گول کیپر مینول نائیر نے خود ہی اپنی ٹیم کے خلاف ایک مزید گول کر دیا۔

شالکے کا کلب گزشتہ سیزن میں دوسرے نمبر پر رہا تھا لیکن اس مرتبہ ابھی تک یہ کوئی بھی میچ نہیں جیت سکا اور اس کا کوئی بھی پوائنٹ نہیں ہے۔ اگرچہ شالکے کے کوچ فیلکس میگاتھ نے اس مرتبہ کئی اہم کھلاڑیوں کے ساتھ معاہدے کئے ہیں لیکن ان میں سے کوئی بھی ابھی تک شالکے کو کامیابی دلانے میں کامیاب نہیں ہو سکا۔

فیلکس میگاتھ نے جن کھلاڑیوں کو نیا نیا اپنی ٹیم میں شامل کیا ہے، ان میں ہالینڈ کے معروف کھلاڑی Klaas-Jan Huntelaar شامل ہیں۔ وہ 35 ملین یورو کے ایک معاہدے کے ساتھ شالکے کا حصہ بنے ہیں۔

Fussball TSG 1899 Hoffenheim - FC Schalke 04

ہالینڈ کے معروف کھلاڑی Klaas-Jan Huntelaar بھی شالکے کو نہ جتوا سکے

مسلسل تیسرا میچ ہارنے کے باوجود فیلکس میگاتھ نے کہا ہے کہ ان کی ٹیم بہترین کھیل پیش کر رہی ہے،’’ ہمیں صرف ایک جیت کی ضرورت ہے اور پھر حالات ہمارے حق میں واپس لوٹ آئیں گے۔‘‘

بنڈس لیگا کے تیسرے میچ ڈے کے دوران کل 9 میچ کھیلے جائیں گے۔ جمعہ کو کھیلے جانے والے میچ کے علاوہ ہفتے کے دن پانچ جبکہ اتوار کو تین میچ کھیلے جائیں گے۔

اس وقت بنڈس لیگا کے پوائنٹ ٹیبل پرہوفن ہائم کی ٹیم 9 پوائنٹس کے ساتھ پہلے نمبر پر ہے۔

رپورٹ : عاطف بلوچ

ادارت : افسر اعوان

DW.COM