1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا: ڈورٹمنڈ چیمپیئن بننےکے قریب تر

جرمنی کی قومی فٹ بال لیگ بنڈس لیگا کے 28 ویں میچ ڈے کے سلسلے میں ہفتے کو کھیلے گئے ایک میچ میں ڈورٹمنڈ نے ہینوور کو ایک کے مقابلے میں چار گول سے شکست دے دی۔

default

فیڈرل لیگ کی اب تک کی ٹاپ ٹیم ڈورٹمنڈ بنڈس لیگا کے رواں سیزن کی چیمپیئن بننے کے قریب تر پہنچ گئی ہے۔ اس فتح کے ساتھ ہی ڈورٹمنڈ نے پوائنٹس ٹیبل پر دوسرے نمبر کی ٹیم لیورکوزن پر سات پوائنٹس کی برتری برقرار رکھی۔ واضح رہے کہ بنڈس لیگا کے ابھی مزید چھ میچ ڈے باقی ہیں۔ اگر ڈورٹمنڈ اس لیگ کی چیمپیئن بن جاتی ہے، تو سن 2002ء کے بعد یہ پہلا موقع ہو گا، جب اس کے ہاتھ یہ اعزاز آئے گا۔

کھیل کا پہلا ہاف بغیر کسی گول کے برابر رہا۔ میچ کے 57 ویں منٹ میں ہینوور کی طرف سے ناروے سے تعلق رکھنے والے کھلاڑی Mohammed Abdellaoue نے گول کر کے اپنی ٹیم کو برتری دلا دی، تاہم یہ برتری صرف دو منٹ تک ہی قائم رہ سکی۔ کھیل کے 59 ویں منٹ میں ڈورٹمنڈ کی طرف سے نوجوان جرمن کھلاڑی ماریو گیوٹسے نے گول کر کے ہینوور کی برتری کو ختم کر دیا۔ ڈورٹمنڈ کی طرف سے دوسرا اور تیسرا گول کرنے والے کھلاڑی Lucas Barrios تھے جبکہ چوتھا گول کیون گروس کروئٹس نے کیا۔

Dortmunds Lucas Barrios jubelt mit seinen Kameraden im Spiel Borussia Dortmund vs. Hannover 96 FLASH Galerie

ڈوٹمنڈ کے کھلاڑی فتح کا جشن مناتے ہوئے

ہفتے کے روز کھیلے گئے دیگر میچوں میں لیورکوزن نے کائزرز لاؤٹرن کو صفر کے مقابلے میں ایک گول سے شکست دے دی۔ بائرن میونخ نے بھی اپنی مدمقابل ٹیم مؤنشن گلاڈباخ کو ایک صفر سے ہرا دیا۔ مائنز اور فرائی برگ کا مقابلہ ایک ایک گول سے جبکہ ہوفن ہائم اور ہیمبرگ کا میچ بغیر کسی گول کے برابر رہا۔ شٹٹ گارٹ اور ویردر بریمن کا میچ بھی ایک ایک گول کے ساتھ برابری کی بنیاد پر ہی اختتام پذیر ہوا۔

رواں میچ ڈے میں گزشتہ روز شالکے اور سینٹ پاؤلی کے درمیان کھیلے گئے میچ کو اختتام سے دو منٹ قبل اس وقت ادھورا ہی چھوڑ دیا گیا تھا، جب تماشائیوں کے ایک اسٹینڈ سے ریفری کے ایک معاون کو پلاسٹک کے ایک گلاس سے نشانہ بنایا گیا تھا۔ اس وقت شالکے کی ٹیم صفر کے مقابلے میں دو گول کی برتری لیے ہوئے تھی۔

آج اتوار کے روز دو میچ کھیلے جائیں گے۔ کولون کا میچ نیورمبرگ کی ٹیم سے جبکہ فرینکفرٹ کا مقابلہ وولفس برگ سے ہو گا۔

رپورٹ: عاطف توقیر

ادارت: مقبول ملک

DW.COM

ویب لنکس