1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا: ڈورٹمنڈ نے ہیمبرگ کو شکست دے دی

جرمنی کی قومی فٹ بال لیگ بنڈس لیگا کے 12ویں میچ ڈے کے پہلے روز لیگ کی پہلے نمبر کی ٹیم ڈورٹمنڈ نے ہیمبرگ کو صفر کے مقابلے میں دو گولوں سے شکست دے دی۔

default

جمعے کے روز کھیلے گئے اس میچ میں ڈورٹمنڈ کی طرف سے دونوں گول کھیل کے دوسرے ہاف میں کئے گئے۔ ڈورٹمنڈ کی طرف سے پہلا گول جاپان سے تعلق رکھنے والے کھلاڑی شنجی کاگاوا نے کیا جبکہ دوسرا گول لوکاس باریوز نے کیا۔ اس میچ کو دیکھنے کے لئے اسٹیڈیم میں موجود تماشائیوں کی تعداد 80 ہزار سے زائد تھی۔

Fußball Bundesliga Borussia Dortmund Hamburger SV

ڈورٹمنڈ کی طرف سے پہلا گول کرنے والے شنجی کاگاوا

اس فتح کے ساتھ ڈورٹمنڈ کی ٹیم اب فیڈرل لیگ میں سات پوائنٹس کے واضح فرق سے دوسرے نمبر کی ٹیم مائنز سے بہت آگے ہے۔ میچ میں جاری ڈیڈ لاک کا خاتمہ کھیل کے دوسرے ہاف کے آغاز کے چار منٹ بعد جاپانی مِڈ فیلڈر کاگاوا نے ڈورٹمنڈ کو ایک گول کی برتری دلا کر کیا۔ کھیل کے 70 ویں منٹ میں باریوز نے گول کر کے ڈورٹمنڈ کی برتری کو اور بھی مستحکم کر دیا جو کھیل کے اختتام تک قائم رہی۔

فیڈرل لیگ میں باریوز کا مجموعی طور پر یہ ساتواں گول تھا جبکہ اس میچ میں گول کر کے کاگووا نے اپنے مجموعی گولوں کی تعداد چھ کر لی۔ ڈورٹمنڈ کی ٹیم نے اب تک کھیلے گئے 12 میچوں میں سے دس میں کامیابی حاصل کی ہے اور مجموعی طور پر اس کے پوائنٹس کی تعداد 31 ہو گئی ہے۔

لیگ میں اب تک دوسرے نمبر کی ٹیم مائنز کے 24 پوائنٹس ہیں اور وہ آج ہفتہ کو اپنا میچ ہینوور کے خلاف کھیل رہی ہے۔ لیگ میں تیسرے نمبر کی ٹیم لیورکوزن آج ہی ایک میچ میں سینٹ پاؤلی کی ٹیم کا مقابلہ کرے گی۔ بنڈس لیگا کی دفاعی چیمپیئن بائرن میونخ کی ٹیم اس وقت نویں پوزیشن پر ہے اور اس کا میچ اتوار کے روز لیگ میں چھٹے نمبر کی ٹیم نیورمبرگ سے ہو گا۔

Fußball Bundesliga SC Freiburg gegen FSV Mainz 05 Flash-Galerie

آج مائنز کی ٹیم اپنا میچ ہینوور کے خلاف کھیل رہی ہے

آج ہفتے کے روز کھیلے جانے والے دیگر میچوں میں کائزرز لاؤٹرن کی ٹیم شٹٹ گارٹ کے مد مقابل آ رہی ہے۔ وولفس برگ کی ٹیم کا میچ شالکے سے ہے جبکہ بریمن کی ٹیم فرینکفرٹ کا سامنا کر رہی ہے۔ اتوار کے روز ہوفن ہائم کا مقابلہ فرائی برگ سے جبکہ بائرن میونخ کا میچ نیورمبرگ سے ہو رہا ہے۔

رپورٹ: عاطف توقیر

ادارت: مقبول ملک

DW.COM

ویب لنکس