1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا: مائنز نے بائرن میونخ کو بھی شکست دے دی

جرمن قومی فٹ بال لیگ بنڈس لیگا کے چھٹے میچ ڈے میں ہفتے کے روز کھیلے جانے والے ایک میچ میں مائنز کی کم تجربہ کار سمجھی جانے والی ٹیم نے لیگ کی دفاعی چیمپیئن بائرن میونخ کی ٹیم کو دو کے مقابلے میں ایک گول سے شکست دے دی۔

default

بائرن میونخ کو شکست سے دوچار کرنے والی مائنز کی ٹیم موجودہ سیزن میں اب تک کھیلے گئے اپنے تمام میچ جیت چکی ہے اور پوائنٹس ٹیبل پر سب سے اوپر ہے۔

دونوں ٹیموں کے درمیان ہفتے کے روز ہونے والے مقابلے میں کھیل کے پہلے ہاف کے اختتام تک میچ ایک ایک گول سے برابر تھا، تاہم میچ کے دوسرے ہاف میں مائنز نے بائرن میونخ کے خلاف برتری حاصل کر لی، جو کھیل کے اختتام تک برقرار رہی۔

Fußball Bundesliga 6. Spieltag Schalke 04 - VfL Borussia Mönchengladbach Flash-Galerie

شالکے اور میونشن گلاڈباخ کی ٹیموں کے درمیان میچ کا منظر

کھیل کے آغاز کے 15 ویں منٹ میں Sami Allagui نے مائنز کو برتری دلوائی، جسے بائرن میونخ کی ٹیم نے پہلے ہاف کے اختتام سے صرف ایک منٹ قبل برابر کیا۔ بائرن میونخ کا یہ گول مائنز کے دفاعی کھلاڑی بو زیونزن کی غلطی سے ہوا، جس نے ڈی میں بیک پاس کیا، جسے کرسٹیان ویٹکو روک نہ پائے اور وہ مائنز کے اپنے ہی گول میں پہنچ گیا۔ میچ کے دوسرے ہاف کے13 ویں منٹ میں Adam Szalai نے گول کر کے مائنز کو ایک مرتبہ پھر برتری دلوا دی۔

میچ کے بعد اپنے انٹرویو میں مائنز کے کوچ ٹوماس ٹوشیل نے اس جیت کو ناقابل یقین قرار دیا۔ تاہم انہوں نے کہا کہ اس میچ سے قبل اپنے پانچوں مقابلے جیتنے والی مائنز کی ٹیم کے کھلاڑیوں کے حوصلے بہت بلند تھے اور وہ جیت کے لئے ہی میدان میں اترے تھے۔

ہفتے کے روز ہونے والے دیگر مقابلوں میں شالکے اور میونشن گلاڈباخ کا مقابلہ دو دو گول سے برابر رہا۔ شٹٹ گارٹ کے خلاف لیورکوزن نے چار ایک سے کامیابی حاصل کی۔ فرینکفرٹ نے نیورنبرگ کو دو صفر سے ہرایا۔ سینٹ پاؤلی کے خلاف ڈورٹمنڈ نے ایک تین سے فتح حاصل کی جبکہ ویردر بریمن کی ٹیم ہیمبرگ کو تین دو سے شکست دینے میں کامیاب رہی۔

Fußball Bundesliga 6. Spieltag FC Bayern München - 1. FSV Mainz 05

کھیل کے آغاز کے 15 ویں منٹ میں Sami Allagui نے مائنز کو برتری دلوائی

آج اتوار کے روز وولفس برگ کی ٹیم فرائی برگ کے مد مقابل ہو گی جبکہ کائزرز لاؤٹرن کا مقابلہ ہینوور کی ٹیم سے ہو گا۔

اس وقت پوائنٹس ٹیبل پر مائنز کی ٹیم 18 پوائنٹس کے ساتھ سر فہرست ہے جبکہ دوسرے نمبر پر 15 پوائنٹس کے ساتھ ڈورٹمنڈ کی ٹیم ہے۔ ہوفن ہائم اور لیورکوزن کی ٹیموں کے گیارہ گیارہ پوائنٹس ہیں تاہم گول اوسط کے اعتبار سے یہ دونوں ٹیمیں بالترتیب تیسرے اور چوتھے نمبر پر ہیں۔

رپورٹ: عاطف توقیر

ادارت: مقبول ملک

DW.COM

ویب لنکس