1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا : لیورکوزن کے خلاف ڈورٹمنڈ کی شاندار فتح

جرمنی کی قومی فٹ بال لیگ بنڈس لیگا کے 18 ویں میچ ڈے کے جمعہ کی شام کھیلے گئے میچ میں لیگ کی ٹاپ ٹیم ڈورٹمنڈ نے میزبان لیورکوزن کو ایک کے مقابلے میں تین گول سے شکست دے دی۔

default

میچ کی خاص بات ڈورٹمنڈ کے کھلاڑی کیون گروسکروئٹس کے دو شاندار گول تھے۔ ڈورٹمنڈ کی طرف سے تیسرا گول ٹین ایجر ماریو گیوٹسے نے کیا۔

میچ کے پہلے ہاف کے اختتام تک دونوں ٹیموں میں سے کوئی بھی برتری حاصل کرنے میں ناکام رہا۔ ڈورٹمنڈ کی طرف سے لیورکوزن کے گول پر چند خطرناک حملے کئے گئے تاہم خوش قسمتی نے ڈورٹمنڈ کا پہلے ہاف میں ساتھ نہ دیا۔ پہلے ہاف میں لیورکوزن کا کھیل خاصا منجھا ہوا دکھائی دیا اور پوری ٹیم نے ڈورٹمنڈ کے کھلاڑیوں کے درمیان گٹھ جوڑ کامیاب نہ ہونے دیا، تاہم کھیل کا دوسرا ہاف لیورکوزن کے لئے تباہ کن رہا۔ دوسرے ہاف کے 50 ویں منٹ میں ڈورٹمنڈ کی طرف سے پہلا گول کیا گیا اور اگلے چھ منٹوں میں مزید دوگول کر کے کھیل کی صورتحال یکسر بدل کر رکھ دی گئی۔

لیورکوزن کی جانب سے کھیل کے آخری لمحات میں شٹیفان کیسرلنگ نے گول کیا تاہم یہ گول کھیل میں کوئی زیادہ تبدیلی کا باعث نہ بن سکا۔

بنڈس لیگا پوائنٹس ٹیبل پر پہلے سے سرفہرست ٹیم ڈورٹمنڈ اب 46 پوائنٹس کے ساتھ اپنی پوزیشن اور بھی مستحکم کرنے میں کامیاب ہو گئی ہے۔ ڈورٹمنڈ کی ٹیم پوائنٹس میں اپنے سے کم مائنز اور لیورکوزن سے اب 13 پوائنٹس کا فرق حاصل کر چکی ہے۔

Flash-Galerie Fußball-Bundesliga Dortmund Leverkusen 14.01.2011

لیورکوزن کے کھلاڑیوں نے پہلے ہاف میں بہترین کھیل پیش کیا

پوائنٹس ٹیبل پر مائنز اور لیورکوزن 33 پوائنٹس تاہم بہتر گول اوسط کی بنیاد پر بالترتیب دوسری اور تیسری پوزیشن پر ہیں۔ لیگ میں چوتھی پوزیشن ہینوور جبکہ پانچویں پوزیشن دفاعی چیمپیئن بائرن میونخ کو حاصل ہے۔

اٹھارہویں میچ ڈے کے سلسلے میں آج نیورمبرگ کا مقابلہ میونشن گلاڈباخ سے ہو رہا ہے جبکہ سینٹ پاؤلی کی ٹیم فرائی برگ کے مدمقابل آ رہی ہے۔ اس کے علاوہ مائنز کا میچ شٹٹ گارٹ، وولفس برگ کا مقابلہ بائرن میونخ، ہوفن ہائم کا میچ بریمن اور شالکے کا مقابلہ ہیمبرگ سے ہو رہا ہے۔

رپورٹ : عاطف توقیر

ادارت : ندیم گِل

DW.COM

ویب لنکس