1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا: شالکے نے سینٹ پاؤلی کو شکست دے دی

جرمنی کی قومی فٹ بال لیگ بنڈس لیگا میں اب تک خاصی مایوس کن کارکردگی کا مظاہرہ کرنے والی ٹیم شالکے نے سینٹ پاؤلی کو جمعے کے روز کھیلے گئے میچ میں تین صفر سے شکست دے دی۔

default

رواں سیزن میں اپنے پہلے دس مقابلوں میں صرف ایک میچ جیتنے والی شالکے کی ٹیم گزشتہ سیزن میں دوسرے نمبر پر رہی تھی۔ جمعے کے روز شالکے کی اس فتح میں ماضی میں ریئل میڈرڈ کے لئے کھیلنے والے فٹ بالر راؤل کا اہم کردار رہا۔ انہوں نے شالکےکی جانب سے گول میچ کے 14 ویں منٹ میں کیا۔ میچ کے 53 ویں منٹ میں راؤل نے اپنے ساتھی Klaas-Jan Huntelaar کو ایک خوبصورت پاس دیا، جو شالکے کے لئے دوسرے گول کا باعث بنا۔ کھیل کے اختتام سے صرف نو منٹ قبل راؤل نے ایک اور گول کر کے اپنی ٹیم کی جیت کو یقینی بنا دیا۔

Fußball Bundesliga FC Schalke 04 gegen FC St. Pauli

شالکے کے کھلاڑی فتح کا جشن مناتے ہوئے

شالکے کی ٹیم اس میچ میں فتح حاصل کرنے کے بعد اب بنڈس لیگا کے پوائنٹس ٹیبل پر 15 ویں پوزیشن پر آ گئی ہے۔ اِس طرح شالکے نے اب تک کھیلے گئے اپنے 11 میچوں میں سے محض دو میں کامیابی حاصل کی ہے۔ بنڈیس لیگا چارٹ میں اس وقت ڈورٹمنڈ کی ٹیم سرفہرست ہے، جس کے 25 پوائنٹس ہیں جبکہ دوسرا نمبر مائنز کا ہے، جس کے 24 پوائنٹس ہیں۔

ہوفن ہائم کی ٹیم 18 پوائنٹس کے ساتھ تیسری جبکہ لیورکوزن چوتھی پوزیشن پر ہے۔ فرینکفرٹ کی ٹیم 16 پوائنٹس کے ساتھ اس چارٹ میں پانچویں نمبر پر براجمان ہے۔

آج ہفتے کے روز نورنبرگ کی ٹیم کولون کے مدمقابل آئے گی۔ ایک اور میچ میں موئنشن گلاڈ باخ کا مقابلہ بنڈس لیگا کی دفاعی چیمپیئن ٹیم بائرن میونخ سے ہو رہا ہے۔ فرینکفرٹ کی ٹیم وولفس برگ کے مدمقابل آئے گی جبکہ ہیمبرگ کا مقابلہ ہوفن ہائم سے اور مائنز کا میچ فرائی برگ کی ٹیم سے ہوگا۔

Flash-Galerie 1. Bundesliga 10. Spieltag 1. FSV Mainz 05 - Borussia Dortmund

ڈورٹمنڈ کی ٹیم لیگ میں پہلی پوزیشن پر ہے

اتوار کے روز ڈورٹمنڈکی ٹیم ہینوور کے مدمقابل آئے گی اور لیورکوزن کا میچ کائزرز لاؤٹرن کی ٹیم سے ہوگا۔ بنڈس لیگا کے گیارہویں میچ ڈے کا آخری مقابلہ شٹٹ گارٹ اور بریمن کی ٹیموں کے درمیان اتوار کی شام کھیلا جائے گا۔

رپورٹ: عاطف توقیر

ادارت: امجد علی

DW.COM