1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بنڈس لیگا، بائرن میونخ نمبر ایک پر آ گئی

بنڈس لیگا کے پندرہویں میچ ڈے کے دوسرے دن ایک اہم میچ میں بائرن میونخ نے ویردر بریمن کی ٹیم کو ایک کے مقابلے میں چار گول سے شکست دے کر پوائنٹس ٹیبل پر پہلی پوزیشن حاصل کر لی ہے۔

default

میونخ کے فلپ لاہم، بائیں

بنڈس لیگا یعنی جرمن فیڈرل فٹ بال لیگ کے پندرہویں میچ ڈے کے دوران ہفتہ کے دن کھیلے گئے اس اہم میچ میں میونخ کی ٹیم نے عمدہ کارکردگی دکھائی اور ویردر بریمن کے کھلاڑیوں کو خاص کھیل پیش کرنے کا کوئی موقع نہ دیا۔

اس میچ میں کامیابی کے ساتھ میونخ کے مجموعی پوائنٹس اب31 ہوگئے ہیں اور یوں اس نے لیگ ٹیبل پر پہلی پوزیشن حاصل کر لی ہے۔ ویردر بریمن کے پوائنٹس پچیس ہیں اور اس کی اس وقت چوتھی پوزیشن ہے۔

اس میچ کے بعد بریمن کے کوچ تھوماس شاف نے اعتراف کیا کہ ان کی ٹیم اچھا نہ کھیل سکی اور اس لیے اسے ہارنا چاہیے تھا۔ انہوں نے کہا کہ میونخ جیسی اعلٰی ٹیم کے ساتھ کھیلتے ہوئے خود اعتمادی ضروری ہوتی ہے، جو اس مخصوص میچ کے دوران بریمن کے کھلاڑیوں میں نظر نہ آئی۔

Fußball Bundesliga VfL Borussia Mönchengladbach - BvB Borussia Dortmund

ڈورٹمنڈ اور مؤنشن گلاڈ باخ کے مابین کھیلے گئے میچ کا ایک منظر

بنڈس لیگا کے سلسلے میں ہفتہ کے دن مجموعی طور پر چھ میچ کھیلے گئے۔ ایک اہم میچ میں دفاعی چیمپئن ڈورٹمنڈ اور مؤنشن گلاڈ باخ کی ٹیمیں مد مقابل تھیں۔ ان دونوں کے پاس ہی موقع تھا کہ وہ یہ میچ جیت کر پوائنٹس ٹیبل پر پہلے نمبر پر آجائیں تاہم یہ میچ ایک ایک گول سے برابر ہو گیا اور یوں دونوں ٹیموں کو ایک ایک پوائنٹ ہی مل سکا۔

ڈورٹمنڈ اور مؤنشن گلاڈ باخ کے اگرچہ پوائنٹس برابر ہیں لیکن اچھی گول اوسط کی بنیاد پر ڈورٹمنڈ کی ٹیم دوسرا نمبر حاصل کرنے میں کامیاب ہو گئی ہے۔ ان دونوں ٹیموں نے بھی اپنے پندرہ پندرہ میچ کھیل لیے ہیں اور دونوں کے تیس تیس پوائنٹس ہیں۔

بنڈس لیگا کے پندرہویں میچ ڈے کے دوسرے دن یعنی ہفتہ کو اشٹٹ گارٹ اور کولون کی ٹیموں کے مابین کھیلا گیا میچ دو دو گول سے برابر رہا۔ وولفسبرگ اور مائنز کے مابین منعقد کیا گیا میچ بھی دو دو گول سے برابر ہوا۔ فرائی برگ اور ہینوور کا میچ ایک ایک گول سے بے نتیجہ رہا جبکہ برلن اور کائزرز لاؤٹرن کا میچ بھی ایک ایک گول سے برابر رہا۔

بنڈس لیگا کے موجودہ میچ ڈے کے تیسرے اور آخری دن یعنی آج اتوار کو دو میچ کھیلے جائیں گے۔ ہیمبرگ کی ٹیم نیورمبرگ کے مد مقابل ہوگی جبکہ شالکے اور آؤگسبرگ کی ٹیمیں آمنے سامنے آئیں گی۔

رپورٹ: عاطف بلوچ

ادارت: مقبول ملک

DW.COM

ویب لنکس