1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

برمنگھم ٹیسٹ: اکمل ڈراپ، یوسف شامل نہیں

پاکستانی سلیکٹرز نے تجربہ کار مگر آوٴٹ آف فارم وکٹ کیپر بیٹسمین کامران اکمل کو انگلینڈ کے خلاف دوسرے ٹیسٹ میچ کے لئے ڈراپ کیا ہے جبکہ کپتان سلمان بٹ کے مطابق اکمل کو صرف آرام دیا گیا ہے۔

default

دوسری جانب اس بات کی بھی تصدیق ہو گئی ہے کہ ریٹائرمنٹ کا اپنا فیصلہ واپس لینے والے بیٹسمین محمد یوسف برمنگھم ٹیسٹ کے لئے ٹیم میں شامل نہیں کئے جائیں گے۔ یوسف جمعرات کو ہی پاکستان سے برطانیہ پہنچے، جس کے باعث ان کے پاس اتنا وقت ہی نہیں تھا کہ وہ باقی کھلاڑیوں کے ہمراہ ٹیم پریکٹس میں حصّہ لے سکتے۔

خراب فارم کے باعث ڈراپ ہونے والے کامران اکمل کی جگہ اب دوسرےٹیسٹ میں چوبیس سالہ ذوالقرنین حیدر وکٹ کیپر کے فرائض سر انجام دیں گے۔ اکمل نے چار میچوں پر مشتمل ٹیسٹ سیریز کے پہلے میچ کی دونوں ہی اننگز میں کئی کیچ گرائے اور سٹمپنگ کا ایک آسان سا موقع بھی گنوا دیا تھا۔

Pakistan Sport Cricket Kamran Akmal

کامران اکمل نے چھ ٹیسٹ سنچریاں سکور کی ہیں

ذوالقرنین حیدر نے اپنی سلیکشن پر مسرت کا اظہار کیا ہے۔’’میں ان تمام افراد کا شکریہ ادا کرنا چاہوں گا جنہوں نے مجھے ٹیم میں شامل کرنے کا فیصلہ کیا ہے۔ مجھے یقین تھا کہ سیریز کے آخری مرحلے میں مجھے کم از کم ایک ٹیسٹ میچ میں کھیلنے کا موقع ضرور ملے گا لیکن یہ کبھی نہیں سوچا تھا کہ مجھے دوسرے ہی ٹیسٹ کے لئے ٹیم میں شامل کیا جائے گا۔‘‘

اکمل نے ٹرینٹ برج ٹیسٹ کی دوسری اننگز میں نہ صرف کولنگ وُڈ کا بہت ہی آسان کیچ چھوڑا بلکہ بیٹنگ کے شعبے میں بھی وہ بری طرح ناکام رہے۔ وہ اپنی دونوں ہی اننگز میں بغیر کوئی رن بناکر پویلین لوٹ گئے تھے۔ تاہم دلچسپی کی بات یہ ہے کہ یوسف کے برطانیہ پہنچنے سے پہلے وہ پاکستان کے سکواڈ میں واحد ایسے بیٹسمین تھے، جس کی ٹیسٹ کرکٹ میں چھ سنچریاں ہیں۔

Mohammad Yusuf

بیٹسمین محمد یوسف انگلینڈ پہنچ چکے ہیں

اکمل نے اب تک اکیاون ٹیسٹ میچوں میں چھ سنچریوں اور بارہ نصف سنچریوں کی مدد سے 2624 رنز بنا رکھے ہیں۔

پاکستانی ٹیسٹ ٹیم کے کپتان سلمان بٹ نے اکمل کے بارے میں کہا:’’میں یہ کہوں گا کہ اکمل کو آرام دیا گیا ہے۔ اس وقت وہ اچھی فارم میں نہیں ہیں۔ تھوڑے سے آرام سے وہ آئندہ دس روز میں بغیر کسی پریشر کے اپنی صلاحیتوں کے بارے میں سوچیں گے۔ مجھے پورا یقین ہے کہ وہ ایک چیمپیئن کھلاڑی ہیں اور بین الاقوامی کرکٹ میں اُن کی واپسی یقینی ہے۔‘‘ اکمل نے گزشتہ اٹھائیس ٹیسٹ میچوں میں مجموعی طور پر وکٹ کے پیچھے چونتیس مواقع ضائع کئے ہیں۔

دریں اثناء پاکستانی کرکٹ ٹیم ٹرینٹ برج ٹیسٹ میچ میں عبرتناک شکست کے باوجود انگلینڈ کے خلاف دوسرے ٹیسٹ کے لئے پُر اعتماد نظر آ رہی ہے۔ دونوں ٹیموں کے درمیان سیریز کا دوسرا میچ آج جمعہ سے برمنگھم میں شروع ہو رہا ہے۔ پاکستانی فاسٹ بولر اور سوئنگ بولنگ کے ماہر محمد آصف نے توقع ظاہر کی ہے کہ ٹیم ٹرینٹ برج میں ہوئی شکست کا بدلہ ضرور لے گی۔ انگلینڈ نے ٹرینٹ برج میں پاکستانی نوجوان ٹیم کو 354 رنز سے ہرایا تھا تاہم اسی نا تجربہ کار ٹیم نے ہیڈنگلے میں آسٹریلیا جیسی مضبوط ٹیم کو تین وکٹوں سے شکست دی تھی۔

رپورٹ: گوہر نذیر گیلانی

ادارت: عابد حسین

DW.COM

ویب لنکس