1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

برفباری کے باعث فرینکفرٹ ایئرپورٹ پر سینکڑوں پروازیں منسوخ

جرمنی میں شدید برفبار ی کے نتیجے میں اس کے مصروف ترین فرینکفرٹ ایئرپورٹ پر اتوار کو تقریباﹰ 500 پروازیں منسوخ کر دی گئی ہیں۔ برفباری کا سلسلہ یورپ کے مختلف ممالک میں جاری ہے، جس سے ایئرٹریفک کا نظام بُری طرح متاثر ہے۔

default

فرینکفرٹ ایئرپورٹ

فرینکفرٹ ایئرپورٹ کی ایک ترجمان نے خبررساں ادارے اے ایف پی کو بتایا کہ ابھی تک 490 پروازیں منسوخ کی جا چکی ہیں۔ انہوں نے کہا، ’دوپہر سے برفباری کے تازہ سلسلے کا خدشہ ہے، جو رات گئے تک جاری رہ سکتا ہے۔’

ترجمان نے کہا کہ اس صورت حال میں اتوار کے لئے شیڈول تقریباﹰ 13سو پروازوں میں سے مزید بھی منسوخ کی جا سکتی ہیں۔

پروازوں کی منسوخی کے باعث فرینکفرٹ ایئرپورٹ پر سینکڑوں مسافر پھنس کر رہ گئے۔ ایئرپورٹ ٹرمینلز پر مسافروں کے قیام کے لئے بیڈ لگا دئے گئے تھے، جہاں بیشتر نے گزشتہ رات بسر کی۔ بعض مسافر گزشتہ دو راتوں سے اپنی پروازوں کا انتظار کر رہے ہیں۔

NO FLASH UK Flughafen Schnee

لندن کے ہیتھرو ایئرپورٹ پر بھی پروازوں کی آمدورفت بری طرح متاثر ہے

جرمن ایئرلائن لفتھانزا نے مسافروں کو ہدایت کی ہے کہ اندرون ملک سفر کے لئے ٹرینیں استعمال کریں۔ تاہم موسم کی شدت کے باعث ٹرینوں کی آمد و رفت بھی متاثر ہے۔

قبل ازیں جمعہ اور ہفتہ کو بھی شدید برفباری کے باعث سینکڑوں پروازیں منسوخ کر دی گئی تھیں۔ ایسی ہی صورت حال کا سامنا یورپ کے دیگر مصروف ہوائی اڈوں کو بھی ہے۔ چونکہ موسم سرما کی چھٹیوں اور کرسمس سیزن کا آغاز ہو چکا ہے اور اسی وجہ سے ان دِنوں زیادہ لوگ سفر کرتے ہیں، اس لئے مسافروں کی مشکلات بھی زیادہ ہیں۔

اتوار کو لندن کے ہیتھرو ایئرپورٹ پر طیاروں کو لینڈنگ کی اجازت نہیں دی جا رہی۔ برفباری کے باعث یورپ کے اس مصروف ہوائی اڈے پر بیشتر رن ویز بلاک پڑی ہیں، جس کی وجہ سے چند پروازوں کو ہی ٹیک آف کا موقع دیا جا رہا ہے۔ ایئرپورٹ ذرائع کا کہنا ہے کہ پیر سے یہ ہوائی اڈہ پوری طرح آپریشنل ہو جائے گا۔

دوسری جانب پاکستانی ذرائع ابلاغ کے مطابق اسلام آباد سے لندن کے لئے روانہ ہونے والی پاکستان انٹرنیشنل ایئرلائنز کی ایک پرواز کو خراب موسم کے باعث پیرس رکنا پڑا ہے جبکہ اتوار کو لاہور سے لندن کے لئے روانہ ہونے والی ایک دوسری پرواز بھی جرمنی میں پھنسی ہوئی ہے۔

خیال رہے کہ اس مرتبہ یورپ میں برفباری کا سلسلہ معمول سے کچھ پہلے نومبر کے اواخر میں ہی شروع ہو گیا۔

Flugverbot Flughafen Vulkan Flash-Galerie

فرینکفرٹ ایئرپورٹ پر مسافروں کو آرام کے لئے بیڈ فراہم کئے گئے ہیں

اس کی وجہ سے متاثرہ علاقوں میں نظام زندگی بدستور درہم برہم ہے اور سب سے زیادہ مشکلات کا سامنا مسافروں کو ہی کرنا پڑ رہا ہے۔

بتایا جاتا ہے کہ جرمنی میں صدیوں بعد شدید ترین سردی سے موسم سرما کا آغاز ہوا ہے۔

رپورٹ: ندیم گِل/خبررساں ادارے

ادارت: شادی خان سیف

DW.COM

ویب لنکس