1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

برفانی تودوں کی زد میں آ کر چھ بھارتی فوجی ہلاک

برفانی تودے گرنے کے دو مختلف واقعات میں کم از کم چھ بھارتی فوجی ہلاک ہو گئے ہیں۔ یہ حادثات بھارت کے زیر انتظام کشمیر میں رونما ہوئے ہیں۔ اِس علاقے میں بدھ کے روز برفانی تودوں کی زد میں آ کر گیارہ افراد مارے گئے تھے۔

بھارتی فوجیوں کی ہلاکت پاکستان اور بھارت کے درمیان متنازعہ علاقے کشمیر سے گزرنے والی لائن آف کنٹرول کے قریب ہوئی۔ یہ فوجی پاکستانی سرحد کے قریب معمول کی گشت پر تھے کہ پہاڑیوں کی چوٹیوں سے گرنے والے برفانی تودوں کی زد میں آ گئے۔ یہ اہم ہے کہ کشمیر کی نوکیلی پہاڑیوں والے علاقوں میں برفانی تودوں کا گرنا معمول سمجھا جاتا ہے۔

 بھارتی فوج کے ایک ترجمان کرنل راجیش کالیا کے مطابق پہلا حادثہ کشمیر کے گریز سیکٹر میں پیش آیا، جہاں تین فوجی ہلاک ہوئے جبکہ سات کو زندہ بچا لیا گیا۔ بھارتی فوج کے ترجمان کے مطابق برفانی تودوں کے گرنے کے دونوں حادثے بدھ کے روز رونما ہوئے تھے۔

Indien Kashmir Schnee (picture-alliance/ dpa)

کشمیر کے پہاڑی علاقوں میں شدید برف باری کا سلسلہ جاری ہے

اسی ترجمان کے مطابق دوسرا واقعہ بھی گریز ہی کے علاقے میں اس وقت پیش آیا جب فوجیوں کی ایک گشتی ٹیم کنٹرول لائن کے قریب گشت کر رہی تھی ۔ ان تودوں کی زد میں آ کر تین فوجی ہلاک ہوئے ہیں۔ کئی فوجی لاپتہ بتائے گئے ہیں۔ فوج کے ترجمان کرنل کالیا نے لاپتہ ہونے والے فوجیوں کی تعداد کے بارے میں کوئی تفصیل فراہم نہیں کی۔

بھارتی فوج کے مطابق لاپتہ فوجیوں کی تلاش کے لیے منظم عمل شروع کر دیا گیا ہے۔ آج جمعرات کے روز تک صرف تین فوجیوں کی لاشیں نکالی جا چکی ہیں۔ خراب موسم تلاش کے عمل میں سب سے بڑی رکاوٹ بنا ہوا ہے۔ دوسری جانب بھارتی محکمہٴ موسمیات کے مطلابق اس علاقے میں اگلے دو ایام کے دوران مزید برفباری کا امکان ہے۔

بھارتی زیر کنٹرول کشمیر میں کل بدھ کے روز بھی برفانی تودوں کے گرنے کے دو واقعات میں پانچ افراد مارے گئے تھے۔ اِن حادثات میں ایک ہی خاندان کے چار لوگ اور ایک بھارتی فوجی کی موت واقع ہوئی تھی۔ ایک ہی خاندان کے افراد بڈگام کے علاقے گریز میں برف تلے دب کر اُس وقت  ہلاک ہوئے، جب وہ سو رہے تھے۔ برف تلے دبے مکان میں سے ایک اٹھارہ سالہ نوجوان کو ریسکیو ٹیم زندہ نکالنے میں کامیاب رہی ہے۔ ایسا ہی دوسرا واقعہ میں ایک بھارتی فوجی سونامرگ کے علاقے میں برف کا تودہ گرنے سے ہلاک ہوا۔