1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

’برطانوی کلب فُلہیم جرمنی پہنچے گا‘

برطانوی فٹ بال کلب فُلہیم نےاعلان کیا ہے کہ یورپی لیگ کے سلسلے میں کھیلے جانے والے سیمی فائنل کے پہلے مرحلے میں ان کا کلب شرکت کرے گا۔

default

آئس لینڈ میں آتش فشاں سے اٹھنے والی راکھ کے نتیجے میں پروازیں مؤخر کرنے کی وجہ سے اس بات کا خدشہ تھا کہ فُلہیم کی ٹیم جمعرات کو ہیمبرگ کے خلاف اپنا طے شدہ میچ کھیلنے کے لئے ہیمبرگ نہیں پہنچ سکے گی۔ تاہم برطانوی کلب نے کہا ہے کہ اس میچ میں شرکت کے لئے زمینی راستہ بھی اختیار کیا جا سکتا ہے۔

پیر کو فُلہیم کلب کی سرکاری ویب سائٹ پر جاری کئے گئے ایک بیان میں کہا گیا ہے:’’ کلب اس بات کی تصدیق کر سکتا ہے کہ بائیس اپریل جمعرات کو ہیمبرگ میں ہونے والے والے یورپی لیگ فٹ بال کپ کے سیمی فائنل کے پہلے مرحلے کا میچ طے شدہ پروگرام کے مطابق کھیلا جائے گا۔ کلب نے ہیمبرگ پہنچنے کے لئے متبادل منصوبہ بنا لیا ہے۔‘‘

Flughafen Paris / Vulkan Island / NO-FLASH

یورپ میں راکھ کے بادلوں کی وجہ سے پروازوں کا سلسلہ تاحال متاثر ہو رہا ہے

اس بیان میں تاہم یہ کہا گیا ہے کہ اس بات کی تصدیق نہیں کی جا سکتی کہ فٹ بال شائقین اور میڈیا کو جرمنی پہنچانے کے لئے بدھ اور جمعرات تک پروازوں کا سلسلہ دوبارہ شروع ہو جائے گا۔ ویب سائٹ پر مزید شائع کیا گیا ہے کہ فُلہیم کلب، ہوا بازی کے متعلقہ اداروں سے مسلسل رابطہ رکھے ہوئے ہے تاکہ یہ صورتحال جلد از جلد واضح ہو سکے۔

اس سے قبل فُلہیم کے مینیجر روئے ہیجسن نے کہا تھا کہ اگر اس میچ میں شرکت کرنے کے لئے زمینی راستہ اختیار کرنے کا مطالبہ کیا جاتا ہے تو یہ نامناسب طرز عمل ہو گا۔

اگر بدھ تک برطانوی فضائی کمپنیاں اپنی پروازیں مؤخر رکھتی ہیں تو برطانوی فُلہیم کلب کی ٹیم سمندری یا زمینی راستے سے براعظم پورپ پہنچے گی جہاں سے وہ جرمنی کے لئے ٹرین یا زمینی راستہ اختیار کرے گی۔

رپورٹ: عاطف بلوچ

ادارت: کشور مصطفٰے