1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

برطانوی شہزادہ ولیئم کی شادی کا اعلان

برطانوی ولی عہد شہزادہ چارلس اور شہزادی ڈیانا کے بڑے بیٹے شہزادہ ولیئم کی شادی کا اعلان کر دیا گیا ہے۔ وہ آئندہ برس اپنی دیرینہ دوست کیٹ میڈلٹن کے ساتھ رشتہ ازدواج میں بندھ جائیں گے۔

default

شہزادہ ولیئم کیٹ میڈلٹن کے ساتھ

شاہی اعلامئے کے مطابق دونوں کی منگنی کینیا میں تعطیلات کے دوران ہوئی۔ آٹھ برس قبل اسکاٹ لینڈ کی سینٹ اینڈریوز یونیورسٹی میں شروع ہونے والی محبت کی یہ داستان بالآخر شادی پر منتج ہونے جا رہی ہے۔ امید ظاہر کی جا رہی ہےکہ اس جوڑے کی شادی اگلے برس لندن میں گرمیوں یا بہار کے موسم میں ہو جائے گی۔ دونوں ہی اپنی اپنی عمر کے اٹھائیسویں برس میں ہیں۔

موجودہ اعلان سے کئی مہینوں سے جاری وہ سوالات اور قیاس آرائیاں ختم ہو گئی ہیں کہ شاہی ایئر فورس کے ریسکیو پائلٹ شہزادہ ولیئم آخر کب اپنی دیرینہ دوست کیٹ میڈلٹن کو شادی کے لئے راضی کریں گے۔

شاہی اعلان کے مطابق شہزاہ ولیئم ستمبر کے مہینے میں شمالی ویلز میں واقع رائل ایئرفورس بیس سے ہیلی کاپٹر پائلٹ کی تربیت مکمل کر چکے ہیں اور شادی کے بعد یہ جوڑا اسی بیس کے قریب رہائش پذیر ہوگا۔ شاہی تجزیہ کاروں کے مطابق آٹھ سال کی ایسی رفاقت کے بعد، جس میں دونوں ایک دوسرے کے ساتھ بہت خوش ہوں، شہزادے اور کیٹ میڈلٹن کے درمیان شادی کا ارادہ ناگزیر تھا۔

Scheidung Charles und Diana 1996

پرنس چارلس اور مرحومہ لیڈی ڈیانا

کیٹ میڈیلٹن شہزادہ ولیئم کی طرح ہسٹری آف آرٹس میں ڈگری رکھتی ہیں اور شہزادے کی مرحومہ والدہ لیڈی ڈیانا کی طرح ایک متوسط گھرانے سے ہیں۔ ان کے والد برٹش ایئر ویز میں فلائٹ ڈسپیچر اور والدہ فضائی میزبان تھیں جبکہ مستقبل کی ملکہ کیٹ میڈلٹن نے کچھ عرصہ قبل پارٹیوں کے لئے لوازمات فراہم کرنے کا کاروبار شروع کیا تھا۔ میڈلٹن شہزادہ ولیئم کے ساتھ شادی سے پہلے ہی برطانوی عوام کے دلوں میں دور جدید کی خودمختار ملکہ کے طور پر جگہ حاصل کرنے میں کامیاب ہو چکی ہیں۔

شاہی اعلان کے مطابق اس نوجوان جوڑے کی شادی کا اہتمام لندن میں کیا جائے گا، تاہم ابھی تک جگہ اور تاریخ کا تعین نہیں کیا گیا ہے۔

رپورٹ: عنبرین فاطمہ

ادارت: ندیم گِل

ویب لنکس