1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

بالی وڈ اداکار سلمان خان کے چہرے کی سرجری

بالی وڈ کے نمایاں اداکار سلمان خان چہرے کی سرجری کے لیے امریکہ جا رہے ہیں۔ وہ چہرے کے ایک عصب کی خرابی کا شکار ہیں، جو ان کے لیے انتہائی تکلیف کا باعث بن رہا ہے۔

default

45 سالہ سلمان خان نے جمعے کے روز بھارتی اخبار ہندوستان ٹائمز میں شائع ہونے والے اپنے ایک آرٹیکل میں اس حوالے سے تفصیلات بتائیں۔ انہوں نے بتایا کہ چار برس پرانی اس تکلیف کے لیے وہ سخت قسم کی ادویات کا استعمال بھی کرتے آ رہے ہیں۔ حال ہی میں سپر ہٹ فلم ’دبنگ‘ میں اداکاری کے جوہر دکھانے والے سلمان خان نے اپنے مضمون میں لکھا ہے کہ رفتہ رفتہ ادویات کے استعمال کے باوجود درد میں کمی نہ ہوئی اور وہ گزشتہ ایک برس سے کسی بھی طرح کی ٹھنڈی شے کھانے یا کوئی مشروب پینے سے قاصر ہیں۔

’’درد بہت زیادہ ہے۔ اس لیے میں امریکہ جا رہا ہوں تاکہ اس کا کوئی تدارک کیا جا سکے۔ مجھے شاید ایسا بہت پہلے ہی کر لینا چاہیے تھا۔‘‘

Salman Khan

ابھی حال ہی میں سلمان خان کی فلم دبنگ سپر ہٹ ہوئی ہے

ڈاکٹروں کے مطابق سلمان خان کے چہرے کو دماغ سے جوڑنے والی ایک عصبی ڈور میں خرابی موجود ہے، جو چہرے میں برقی رو کے جھٹکے پیدا کر رہی ہے اور یہی سلمان خان کے لیے شدید تکلیف کا باعث بن رہے ہیں۔ طبی زبان میں اس بیماری کو Trigeminal neuralgia کہتے ہیں۔

سلمان خان کے مطابق اس سلسلے میں ڈاکٹروں نے معائنے کے بعد انہیں یہ بھی بتایا ہے کہ اس تمام خرابی کی وجہ سے ان کی دماغ تک خون کی رسائی کو یقینی بنانے والی رگوں میں تناؤ بھی پیدا ہوا ہے۔

’’وہ کہتے ہیں کہ اس سے موت بھی واقع ہو سکتی ہے، مگر میرے خیال میں وہ صرف مجھے ڈرا رہے ہیں۔‘‘

واضح رہے کہ Trigeminal neuralgia  یا عصبی نظام میں خرابی کی ایک وجہ عمر کو بھی قرار دیا جاتا ہے۔ سلمان خان کے مطابق انہیں چہرے کے ایک حصے عموماﹰ آنکھوں، گالوں اور جبڑوں میں تکلیف ہوتی ہے، جس کی وجہ سے وہ دانت برش کرنے سمیت روز مرہ کے کاموں میں مشکلات کا شکار رہتے ہیں۔

رپورٹ: عاطف توقیر

ادارت: مقبول ملک

DW.COM