1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

مہاجرین کا بحران

ایمیزون: پیگیڈا کے میوزک سے ہونے والی کمائی مہاجرین کے لیے

امریکی آن لائن شاپنگ کمپنی ایمیزون نے کہا ہے کہ جرمنی میں سرگرم مہاجرین مخالف انتہائی دائیں بازو کی تنظیم ’پیگیڈا‘ کے میوزک سے اسے حاصل ہونے والا منافع جرمنی میں پناہ حاصل کرنے والوں ہی کے لیے عطیہ کر دیا جائے گا۔

Deutschland Pegida

ایک برس قبل پیگیڈا نے اپنی تحریک سماجی رابطوں کی ویب سائٹ فیس بک پر شروع کی تھی

خبر رساں ادارے اے ایف پی نے جمعرات کے دن آن لائن ریٹیلر ایمیزون کے حوالے سے بتایا کہ تارکین وطن کی آمد کی مخالف جرمن تحریک ’پیگیڈا‘ کے ایک مشہور گیت کے میوزک سے حاصل کردہ منافع مہاجرین پر ہی خرچ کیا جائے گا۔ اجانب دشمنی یا غیر ملکیوں سے خوف کے نتیجے میں سر اٹھانے والی اس انتہائی کٹر نظریات کی حامل تحریک نے کرسمس کے موقع پر ہی یہ میوزک ایمیزون پر ریلیز کیا تھا۔

DW.COM

پیگیڈا نے اپنے گانے Gemeinsam sind wir stark (اکٹھے ہم مضبوط ہیں) کی صرف ٹیون ہی ریلیز کی تھی، جو جرمنی میں بے پناہ مرتبہ ڈاؤن لوڈ کی گئی۔ ایمیزون کے مطابق پیگیڈا کا نعرہ تصور کی جانے والی یہ ٹیون گزشتہ کچھ دنوں کے دوران ہی ایک لاکھ اسّی ہزار مرتبہ ڈاؤن لوڈ کی جا چکی ہے۔

amazon.de پر اس ٹیون نے معروف برطانوی سنگر اڈَیل کے گانے ’ہیلو‘ کو بھی پیچھے چھوڑ دیا ہے۔ جرمنی میں ڈاؤن لوڈ کیے جانے والوں گانوں اور میوزک کی فہرست میں ’ہیلو‘ اب دوسرے نمبر پر چلا گیا ہے۔

جب ایمیزون نے فیصلہ کیا تھا کہ اس کی طرف سے پیگیڈا کی اس ٹیون کو ریلیز کیا جائے گا تو کئی حلقوں نے اس پر شدید تنقید کی تھی۔ کہا گیا تھا کہ ایمیزون اب انتہائی دائیں بازو کی اس اسلام مخالف تحریک کا میوزک آن لائن فروخت کر کے منافع کمانے کا ارادہ رکھتا ہے۔ تاہم ایمیزون نے اس کمائی کو مہاجرین کے لیے عطیہ کرنے کا اعلان کرتے ہوئے اس تنقید کا بخوبی جواب دے دیا ہے۔

قبل ازیں پیگیڈا کی طرف سے کہا گیا تھا کہ ایمیزون پر اس کی ٹیون سے ہونے والی کمائی کو جرمنی میں بے گھر افراد پرخرچ کیا جائے گا۔ تاہم اکتیس دسمبر کو ایمیزون کی جرمن زبان کی ویب سائٹ نے اعلان کیا کہ یہ رقوم جرمنی آنے والے مہاجرین کے لیے ہوں گی۔

ایمیزون کے مطابق اس میوزک سے حاصل کردہ منافع جرمنی میں فعال ایسی غیر سرکاری تنظیموں کو عطیہ کیا جائے گا، جو مہاجرین کی مدد کے لیے سرگرم ہیں۔

Logo des Internet-Versandhändlers Amazon

ایمیزون کے مطابق تارکین وطن کی آمد کی مخالف جرمن تحریک ’پیگیڈا‘ کے ایک مشہور گیت کے میوزک سے حاصل کردہ منافع مہاجرین پر ہی خرچ کیا جائے گا

ایک برس قبل پیگیڈا نے اپنی تحریک سماجی رابطوں کی ویب سائٹ فیس بک پر شروع کی تھی۔ ابتداء میں چند سو لوگ ہی اس تحریک کی طرف متوجہ ہوئے تاہم آہستہ آہستہ اس نے زور پکڑنا شروع کیا اور بالخصوص ڈریسڈن میں ہزاروں افراد اس مہاجرین مخالف تحریک کے اہتمام کردہ مظاہروں میں شریک ہونا شروع ہو گئے۔

تاہم حال ہی میں اس تنظیم سے متعلق متعدد اسکینڈلز سامنے آنے کی وجہ سے اب اس کی مقبولیت میں کافی کمی ہو چکی ہے۔