اپنی اداؤں سے لاکھوں دل جیتے لیکن ہندو، مسلمان شدت پسند ناراض | فن و ثقافت | DW | 14.02.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

اپنی اداؤں سے لاکھوں دل جیتے لیکن ہندو، مسلمان شدت پسند ناراض

بھارت میں ملیالی کی ایک نئی فلم کے ایک گانے میں مقامی اداکارہ پریا پراکاش وریئر کی اداؤں پر مبنی ویڈیو کلپ وائرل ہو گیا ہے۔ اس گانے کی ویڈیو اب تک کروڑوں مرتبہ دیکھی جا چکی ہے۔

پریا پراکاش وریئر اس میوزک ویڈیو کے ایک حصے میں بڑے فطری انداز میں مرد اداکار کے ساتھ دل لبھانے والی اداؤں کے ساتھ چھیڑ چھاڑ کرتی دکھائی دیتی ہیں۔

بھارتی ملیالی سنیما کی اس نئی رومانٹک مزاحیہ فلم کے لیے فلمائے گئے اس گانے میں پریا کی ان معصومانہ اداؤں پر مبنی کلپ سوشل میڈیا پر وائرل ہو گیا۔

ویلنٹائن ڈے سے چند روز قبل ریلیز کیے گئے اس گانے کے وائرل ہو جانے کے بعد جہاں پریا کو لاکھوں نئے مداح ملے، وہیں ان کے خلاف بھارت کے ہندو اور مسلمان انتہا پسند بھی میدان میں آ گئے۔

بھارت میں بھی آر ایس ایس نامی انتہا پسند ہندوؤں کی تنظیم نے ملک میں ویلنٹائن ڈے منائے جانے کے خلاف مہم شروع کر رکھی تھی۔ ان ہندو قوم پرستوں نے پریا کی اس ویڈیو کو ویلنٹائن ڈے کی ترویج اور اس دن کے خلاف شروع کردہ آر ایس ایس کی مہم سبوتاژ کرنے کی کوشش قرار دیا۔

صرف ہندو قوم پرست ہی نہیں، بلکہ بھارت کی مسلمان آبادی سے تعلق رکھنے والے کئی افراد بھی پریا کی اس ویڈیو کے خلاف میدان میں آ گئے۔

بھارتی ریاست حیدر آباد میں کچھ مسلمان نوجوانوں نے مقامی پولیس کو ایک درخواست جمع کرا دی جس میں کہا گیا ہے کہ اس ملیالم فلم کے گانے اور اس دوران پریا کی اداؤں کے باعث کئی بھارتی مسلمانوں کے جذبات مجروح ہوئے ہیں۔

پریا پراکاش وریئر کی ان بہت فطری سی شرارتی اداؤں کے مداح صرف بھارت ہی میں نہیں، بلکہ سوشل میڈیا پر کئی پاکستانی بھی ان سے متاثر دکھائی دیے۔ ایک صارف کا کہنا تھا کہ پریا نے مختصر دورانیے کے اس کلپ میں جتنے ایکسپریشن دیے، اتنے شاید قطرینہ کیف اپنے پوری فلمی کیریئر میں بھی نہ دے سکیں۔

بھارت کے کئی لبرل سیاست دانوں نے بھی پریا کا یہ کلپ شیئر کیا۔ بھارتی ریاست گجرات سے تعلق رکھنے والے سیاست دان جگنیش میوانی نے ویلنٹائن ڈے کی مبارک دیتے ہوئے پریا کا کلپ شیئر کیا اور لکھا کہ آر ایس ایس کے ویلنٹائن ڈے کے خلاف احتجاج کا بہترین جواب یہ کلپ ہے۔