1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

امریکی مندوب رچرڈ ہالبروک آج پاکستان پہنچ رہے ہیں

خصوصی امریکی مندوب برائے افغانستان و پاکستان رچرڈ ہالبروک آج اسلام آباد پہنچ رہے ہیں۔ محکمہ خارجہ کے مطابق ہالبروک کے دورے کا مقصد متاثرین مالاکنڈ کو اپنے علاقوں میں واپسی کے حوالے سے درپیش مسائل کا جائزہ لینا ہے۔

default

امریکی مندوب رچرڈ ہالبروک

Pakistan Präsident Asif Ali Zardari

ہالبروک پاکستانی صدر آصف زرداری سے بھی ملاقات کریں گے

امریکی اسٹیٹ ڈیپارٹمنٹ کے ترجمان رابرٹ وُوڈ کا کہنا ہے کہ ہالبروک جمعرات تک پاکستان میں رہیں گے جہاں وہ پاکستانی صدر آصف علی زرداری ، وزیر اعظم سید یوسف رضا گیلانی، چیف آف آرمی اسٹاف جنرل اشفاق پرویز کیانی اور انٹیلیجنس سروسز کے سربراہ جنرل احمد شجاع پاشا سے ملاقاتیں کریں گے۔

رابرٹ ووڈ کے مطابق امریکی خصوصی مندوب کےد ورے کا مقصد پاکستانی اعلیٰ قیادت کے ساتھ معاشی اور سیکیورٹی معاملات پر تبادلہ خیال کرنا ہے، خاص طور پر مالاکنڈ آپریشن کی وجہ سے بے گھر ہونے والے افراد کی واپسی اور بحالی کے معاملات موضوع گفتگو ہوں گے۔

بیس لاکھ سے زائد مہاجرین کی اپنے علاقوں میں مرحلہ وار واپسی کا عمل ان دنوں جاری ہے۔ پاکستانی حکومت نے ان متاثرین کی بحالی اور علاقے کی تعمیر نو کے لئے ملکی مالی وسائل بروئے کار لانے کے ساتھ ساتھ بین الاقوامی برادری سے امداد کی اپیل کررکھی ہے۔

افغانستان اور پاکستان کے لئے خصوصی امریکی مندوب رچرڈ ہالبروک طالبان عسکریت پسندوں کے خلاف پاکستانی سیکیورٹی فورسز کی کارروائی سے متاثر ہونے والے افراد کے نمائندوں سے بھی ملاقات کریں گے۔

رچرڈ ہالبروک جمعرات کو افغانستان روانہ ہوجائیں گے۔ امریکی اسٹیٹ ڈیپارٹمنٹ کے مطابق افغانستان میں ان کی مصروفیات کی تفصیلات ابھی تک طے نہیں ہوئیں۔ 20 اگست کو افغانستان میں ہونے والے صدارتی انتخابات اور طالبان کے حملوں میں اتحادی فوجیوں کی بڑھتی ہوئی ہلاکتوں کے تناظر میں ہالبروک کے دورے کو کافی اہم قرار دیا جارہا ہے۔ افغانستان کے مختلف علاقوں میں جولائی کے دوران دہشت گردی کی مختلف کارروائیوں میں اب تک اتحادی اَفواج کے 57 اہکار مارے جا چکے ہیں، جن میں سے 30فوجیوں کا تعلق امریکہ سے ہے۔

BIldergalerie Flüchtlingskrise im Swattal Flüchtlinge Kind mit Ausweis

حکومت مالاکنڈ آپریشن کے متاثرین کو اپنے گھروں کو جانے کی اجازت دے چکی ہے

امریکی صدر باراک اوباما نے حال ہی میں پاکستان اور افغانستان کو اپنی خارجہ پالیسی میں نہایت اہم قرار دیا ہے، اور افغانستان میں قیام امن کے علاوہ القاعدہ کی بیخ کنی کے لئے نئی حکمت عملی اپنانے کا اعلان کیا ہے۔