1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

امریکی معیشت میں اتار، پلوسی کے لئے مشکلات

امریکی ایوان نمائندگان کی قیادت کرنے والی ڈیموکریٹک رہنما نینسی پلوسی کو اگلے ہفتے ہونے والے انتخابات میں شدید مشکلات کا سامنا ہے۔ مبصرین کا خیال ہے کہ ممکنہ طور پر پلوسی ایوان کی اسپیکر کی کرسی سے ہاتھ دھو سکتی ہیں۔

default

چار برس قبل امریکہ میں غیر مقبول عراق جنگ پر اس وقت کے امریکی صدر جارج ڈبلیوبش کے خلاف موثر انتخابی مہم اور شعلہ بیان تقاریر سے انتخابات میں تاریخی فتح حاصل کرنے والی پلوسی، اس بار عوامی جائزوں میں خاصی غیر مقبول دکھائی دے رہی ہیں۔ مبصرین کا خیال ہے کہ ڈیموکریٹک حکومت میں امریکی معیشت میں واضح بہتری نہ آنے اور صدر اوباما کی انتخابی مہم میں کئے گئے وعدوں اور توقعات کے برعکس امریکی عوام کو حاصل ہونے والے کم فوائد کا اثر ایوان نمائندگان پر یقینی طور پر پڑے گا۔

Demokratin Nancy Pelosi ist neue Sprecherin des Repräsentantenhauses

پلوسی ممکنہ طور پر اپنی کرسی سے ہاتھ دھو سکتی ہیں

امریکی ریاست کیلیفورنیا سے منتخب ہونے والی نینسی پلوسی کے حوالے سے سامنے آنے والے عوامی جائزوں میں واضح طور پر دیکھا جا سکتا ہے کہ ہر تین میں سے زیادہ سے زیادہ ایک امریکی شہری ہی پلوسی کو دوبارہ ایوان نمائندگان کا اسپیکر دیکھنا چاہتا ہے۔

مبصرین منگل کے روز ہونے والے امریکی ایوان نمائندگان کے انتخابات میں ریپبلیکن پارٹی کو ممکنہ طور پر فاتح قرار دے رہے ہیں۔ سیاسی مبصرین کا خیال ہے کہ عوامی رائے میں تبدیلی کی وجہ امریکی میں بے روزگاری میں ہونے والا نمایاں اضافہ ہے اور اس پر امریکی عوام ڈیموکریٹ حکومت سے خاصے ناراض ہیں۔

امریکہ کے سینٹر برائے کانگریس اور صدارتی مطالعہ سے منسلک تجزیہ کار جیمز تھربر کے مطابق پلوسی اس بار یقینی طور پر مشکلات کا شکار ہیں، کیونکہ ان کو عوام میں پائے جانے والے غصے اور خدشات کا سامنا ہے۔ جیمز تھربر کا کہنا ہے کہ تاریخی طور پر وہ ایک اہم اسپیکر کی حیثیت سے ہمیشہ یاد رکھی جائیں گی۔

گزشتہ برس امریکہ کی اہم ترین خاتون کے سالانہ مقابلے میں ٹائمز میگزین نے انہیں دوسرے نمبر پر سب سے اہم خاتون قرار دیا تھا۔

Barack Obama Rede im US-Kongress

امریکی صدر اوباما، نائب صدر جوبائیڈن اور اسپیکر نینسی پلوسی کے ہمراہ

ایوان نمائندگان میں ڈیموکریٹس کی برتری صدر اوباما کے لئے اہمیت کی حامل ہے۔ اس برتری کی وجہ سے اوباما انتظامیہ کی طرف سے پیش کردہ قانونی بل نہایت آسانی سے منظور ہوتے رہے ہیں۔ اس امر کا اندازہ اس بات سے لگایا جا سکتا ہے کہ صدر اوباما کسی بھی سابق امریکی صدر کے مقابلے میں قانونی بلوں کی منظوری کے اعتبار سے سب سے آگے ہیں۔

صدر اوباما کی طرف سے ایسے قانونی بل بھی بہت آسانی سے منظور کرا لئے گئے، جو ایوان نمائندگان میں ڈیموکریٹس کی برتری کے بغیر منظور ہونا آسان نہیں تھے۔ عالمی مالیاتی بحران کے وقت 817 بلین ڈالر کا مالیاتی پیکج، امریکہ میں صحت کے شعبے میں بڑے پیمانے کی اصلاحات اور وال سٹریٹ کے حوالے سے سخت قانون سازی ایسے ہی کامیاب اقدامات ہیں۔

رپورٹ : عاطف توقیر

ادارت : افسر اعوان

DW.COM

ویب لنکس