1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

امریکی فوج میں ہم جنس پرستوں کی بھرتی، نیابل منظور

طویل عرصے سے جاری کشمکش کے بعد امریکی فوج میں جنسی رجحانات سے متعلق ’نہ پوچھو، نہ بتاؤ‘ کی پالیسی بالآخر ختم ہو گئی ہے اور ہم جنس پرستوں کے لئے امریکی فوج میں شمولیت کی راہ میں حائل ایک بڑی رکاوٹ دور ہوگئی ہے۔

default

امریکی ایوان نمائندگان میں 194 کے مقابلے میں 234 ووٹوں کی اکثریت سے قانون سازوں نے اس بارے میں ایک قرار داد منظور کر لی ہے۔ ہم جنس پرستوں کے حقوق کے لئے سرگرم حلقوں اور فوجی قیادت سے ملاقاتوں کے بعد امریکی صدر باراک اوباما کی خواہش تھی کہ ایسا ہو۔

قرار داد کی منظوری کے بعد امریکی صدر نے ایک بیان جاری کیا ہے۔ ’’اس قانون کی مدد سے ہم جنس پرست مرد اور خواتین فوج میں ایمانداری اور عزت سے فرائض انجام دے سکیں گے اور یوں ہماری افواج کی طاقت بڑھے گی۔‘‘

اس بل کو قانون بنانے کی حمایت کرنے والے حلقوں کو امید ہے کہ جلد ہی تمام مرحلے طے کرتے یہ بل امریکی صدر باراک اوباما کی میز تک پہنچ جائے گا، جو اس پر دستخط کر کے اسے قانون کی شکل دے دیں گے۔ اس آئندہ قانون پر عملدرآمد کی تاریخ کا تعین پینٹاگون یعنی محکمہء دفاع کی صوابدید پر ہوگا۔

Frau in der USA Armee mit Tommy Franks

ایوان نمائندگان کے ڈیموکریٹ رکن پیٹرک مرفی نے بل کے حق میں تقریر کرتے ہوئے کہا کہ کیا امریکہ دو جنگی محاذوں پر ہوتے ہوئے بھی ساڑھے تیرہ ہزار حاضر سروس فوجیوں سے یہ کہنا برداشت کر سکتا ہے کہ ان کی خدمات اب درکار نہیں۔ ان کا اشارہ فوج میں شامل ساڑھے تیرہ ہزار ہم جنس پرستوں کی جانب تھا۔

مرفی عراقی جنگ میں حصہ لینے والے وہ واحد سابقہ فوجی ہیں جو اب ایوان نمائندگان کے رکن ہیں۔ ری پبلکن ارکان نے اس بل کی مخالفت کرتے ہوئے مؤقف اختیار کیا تھا کہ اس سال دسمبر تک محکمہء دفاع کو ازخود اس قانون کا دوبارہ جائزہ مکمل کرنے دیا جائے۔ سابق امریکی صدارتی امیدوار سینیٹر جان میک کین کا کہنا ہے کہ اس بل کی منظوری سے فوجیوں کے مورال پر منفی اثر پڑے گا۔ خیال رہے کہ میک کین خود بھی فوجی رہ چکے ہیں۔

فوج میں جنسی رجحانات سے متعلق کلنٹن دور کی ’مت پوچھو اور مت بتاؤ‘ کی پالیسی کے مکمل خاتمے کے لئے صدر، وزیر دفاع اور فوجی قیادت کی حمایت درکار ہوگی۔

رپورٹ: شادی خان سیف

ادارت: مقبول ملک

DW.COM

ملتے جلتے مندرجات