1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

امریکہ میں پاکستان اور افغانستان سے متعلق منفی سوچ

گزشتہ دس سال میں امریکی عوام میں پاکستان اور افغانستان سے متعلق مثبت رائے میں نمایاں کمی دیکھی جا رہی ہے۔

default

گیلپ کے سالانہ ورلڈ افیئر پول کے مطابق امریکہ کے 76 فیصد عوام پاکستان سے متعلق منفی رائے رکھتے ہیں۔ اس کے برعکس محض 18 فیصد پاکستان کے بارے میں متعلق سوچ کے حامل ہیں۔ اسی تناظر میں افغانستان سے متعلق منفی رائے رکھنے والے امریکیوں کا تناسب 82 فیصد جبکہ مثبت رائے کے حامل شہریوں کا تناسب 14 فیصد دیکھا گیا ہے۔

جب سے گیلپ سروے کے تحت امریکی عوام سے پاکستان اور افغانستان کے بارے میں رائے لینے کا سلسلہ شروع کیا گیا ہے، موجودہ نتائج منفی ترین ہیں۔ 2005ء مثبت ترین سال تھا، جب امریکی عوام کی ریکارڈ 40 فیصد تعداد افغانستان اور پاکستان سے متعلق اچھی رائے رکھتی تھی۔

Dreiergipfel Washington

گیلپ کے مطابق امریکی عوام میں پاکستان اور افغانستان کے بارے میں منفی رائے فروغ پارہی ہے

اس کے بعد سے امریکی انتظامیہ کے ان دونوں ممالک کے ساتھ حکومتی سطح پر بھی تعلقات مشکلات میں گھرے رہے۔ واشنگٹن حکومت کا افغان صدر حامد کرزئی پر اعتماد کم ہوا اور پاکستانی اسٹیبلشمنٹ کے ساتھ بھی عکسریت پسندوں کے ٹھکانوں کے معاملات پر سرد مہری بڑھی۔ امریکہ میں حال ہی میں کرائے گئے مختلف عوامی جائزوں میں افغانستان میں جنگ اور پاکستان کے ساتھ تعلقات، دونوں ہی کے بارے میں منفی رائے کا رجحان دیکھنے میں آیا ہے۔

اس گیلپ سروے سے ظاہر ہوا ہے کہ امریکی عوام میں جنوبی کوریا سے متعلق مثبت رائے بڑھی ہے۔ سروے میں شامل 65 فیصد شہریوں نے اس ایشیائی ریاست کو امریکہ کا اہم اتحادی قرار دیا۔ واضح رہے کہ جنوبی کوریا کے ساتھ امریکی تعلقات میں 2008ء کے بعد سے بہت زیادہ گرمجوشی دیکھی گئی ہے، جب سے وہاں قدامت پسند لی میونگ باک صدر منتخب ہوئے ہیں۔ دونوں ممالک کے مابین آزادانہ تجارت کا معاہدہ بھی طے پا چکا ہے۔

APEC-Gipfel 2010 in Japan Yokohama

امریکیوں کی نظر میں پسندیدہ ایشیائی ریاست جاپان ہے

امریکی عوام کی نظر میں اب بھی جاپان سب سے پسندیدہ ایشیائی ملک ہے، جس سے متعلق 80 فیصد رائے دہندگان نے مثبت رائے دی۔ چین کے ساتھ تجارتی تنازعات کے باوجود امریکی عوام کی نظر میں اس کمیونسٹ ایشیائی ریاست کے لیے مثبت سوچ بڑھی ہے۔ گزشتہ سال کے عوامی جائزے کے مطابق 42 فیصد امریکی شہری چین کے بارے میں مثبت سوچتے تھے جبکہ اس بار یہ تناسب 47 فیصد رہا۔

عالمی سطح پر امریکی عوام کا پسندیدہ ملک کینیڈا ہے، جس کے بعد برطانیہ اور جرمنی کے نام آتے ہیں۔ اسی طرح ناپسندیدہ ترین ممالک کی فہرست میں شمالی کوریا اور ایران سرفہرست رہے۔

رپورٹ: شادی خان سیف

ادارت: مقبول ملک

DW.COM