1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

مہاجرین کا بحران

امریکا سے تارکین وطن کی ناجائز بے دخلیوں کا خطرہ، رعد الحسین

اقوام متحدہ کے انسانی حقوق کے ہائی کمشنر کے بقول امریکا میں صدر ٹرمپ کی امیگریشن پالیسیوں کے باعث تارکین وطن کی بڑی تعداد میں غیر قانونی ملک بدریوں کا خطرہ ہے۔ انہوں نے یہ بھی کہا کہ امریکا کو بہتر قیادت کی ضرورت ہے۔

سوئٹزرلینڈ سے موصولہ رپورٹوں کے مطابق عالمی ادارے کے انسانی حقوق کے ہائی کمشنر زید رعد الحسین کے مطابق کافی زیادہ خدشہ ہے کہ جنوری میں صدارتی منصب سنبھالنے والے ریپبلکن ڈونلڈ ٹرمپ کی امیگریشن اور تارکین وطن سے متعلق متنازعہ پالیسیوں کے نتیجے میں بچوں اور خواتین سمیت تارکین وطن کو بڑی تعداد میں حراست میں لیا جا سکتا ہے۔ انہوں نے کہا کہ اس طرح ایسی اجتماعی بے دخلیاں بھی شروع ہو سکتی ہیں، جو مروجہ بین الاقوامی قانون کے بالکل منافی ہوں گی۔

جنیوا سے ملنے والی نیوز ایجنسی اے ایف پی کی رپورٹوں کے مطابق ہائی کمشنر الحسین نے یہ بات آج بدھ کے روز سوئٹزرلینڈ کے اسی شہر میں اقوام متحدہ کی انسانی حقوق کی کونسل سے اپنے سالانہ خطاب میں کہی۔

رعد الحسین نے کہا کہ اس طرح کی کارروائیوں سے امریکا میں میکسیکو سے تعلق رکھنے والے تارکین وطن یا مسلمانوں کی طرح کی پوری کی پوری نسلی اور مذہبی برادریوں کے خلاف متعصبانہ اور امتیازی رویوں کو تقویت ملے گی۔

الحسین نے ہیومن رائٹس کونسل سے اپنے اس خطاب میں امریکی صدر ٹرمپ کو خاص طور پر تنقید کا نشانہ بنایا اور کہا کہ امریکا کو ’’مردم بیزاری اور بڑھتے ہوئے نسلی اور مذہبی امتیاز کے باعث اپنے ہاں پیدا ہونے والے چیلنجوں سے نمٹنے کے لیے بہتر قیادت کی ضرورت ہے۔‘‘

ٹرمپ نے سفری پابندیوں کے نئے حکم نامے پر دستخط کر دیے

امریکی اٹارنی جنرل سے استعفے کے مطالبے پر ٹرمپ نا خوش

’ٹرمپ کی انتخابی مہم کے روس سے رابطے‘: پارلیمانی تفتیش ہو گی

اپنے کلیدی خطاب میں رعد الحسین نے مزید کہا کہ کہ واشنگٹن میں نئی ملکی انتظامیہ مختلف بنیادی مسائل کے بارے میں جو رویے اپنائے ہوئے ہے، ان پر انہیں گہری تشویش ہے۔

اقوام متحدہ کے اس ہائی کمشنر نے یہ بھی کہا کہ جس طرح ڈونلڈ ٹرمپ، ان کے بقول، صحافیوں اور ملکی ججوں تک کو نیچا دکھانے کی کوششیں کر رہے ہیں، وہ ایک ’ناامید اور بیزار‘ کر دینے والی حقیقت ہے۔

USA | United Nations High Commissioner for Human Rights Zeid Ra'ad al Hussein (imago/Xinhua)

اقوام متحدہ کے انسانی حقوق کے ہائی کمشنر زید رعد الحسین

اپنی تقریر میں زید رعد الحسین نے صرف امریکا اور ڈونلڈ ٹرمپ پر ہی تنقید نہیں کی بلکہ انہوں نے مہاجرین کے بحران کے تناظر میں یورپی ملکوں کی سیاست میں خامیوں اور نقائص کی نشاندہی بھی کی۔

انہوں نے کہا کہ یورپی سیاستدان بھی ایسے پیغامات پھیلا رہے ہیں، جن میں ’خوف پیدا کرنے والا‘ یہ تاثر دیا جاتا ہے کہ جیسے مہاجرین اور تارکین وطن کی صورت میں یورپ کا رخ کرنے والے کوئی مجبور اور پناہ کے حقدار انسان نہیں بلکہ ’یلغار کر دینے والے مجرموں کے گروہ‘ ہوں۔

انہوں نے کہا کہ ایسے کسی غلط تاثر کا پیدا کرنا اور پھیلایا جانا انتہائی افسوس ناک ہے کیونکہ عام یورپی باشندوں کی اکثریت نے اب تک مہاجرین کا خیر مقدم کرتے ہوئے ان سے ہمدردی کا اظہار کیا ہے۔

DW.COM