1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

اقوامِ متحدہ کا نیا سیکریٹری جنرل کون بنے گا؟

اقوامِ متحدہ کے سیکریٹری جنرل کوفی عنان کے جانشین کے طور پر جنوبی کوریا کے وزیرِ خارجہ بان کی مُون (Ban Ki Mun) کے انتخاب کے امکانات روشن بتائے جا رہے ہیں۔

اقوامِ متحدہ کے سیکریٹری جنرل کوفی عنان کے عہدے کی مدت اِس سال دسمبر میں ختم ہو رہی ہے۔

اقوامِ متحدہ کے سیکریٹری جنرل کوفی عنان کے عہدے کی مدت اِس سال دسمبر میں ختم ہو رہی ہے۔

عالمی سلامتی کونسل میں ہونے والی آزمائشی رائے شماری میں زیادہ تر یعنی پندرہ میں سے بارہ ووٹ سیول کے اِس اُمیدوار بان کی مُون کے حصے میں آئے۔ تاہم اس کا لازمی مطلب یہ نہیں ہے کہ یہ جنوبی کوریائی شخصیت ہی یکم جنوری سن 2007ء سے اقوامِ متحدہ کے اِس اعلیٰ ترین عہدے پر براجمان ہو گی۔

مغربی افریقہ سے تعلق رکھنے والے کوفی عنان کے عہدے کی مدت اِس سال دسمبر میں ختم ہو رہی ہے۔ ایک غیر تحریر شُدہ اصول کے تحت آئندہ سیکریٹری جنرل بننے کی باری اب ایشیا کی کسی شخصیت کی ہے۔

بھارت کے ادیب اور اقوامِ متحدہ کے پبلک افیئرز کے انڈرسیکریٹری جنرل ششی تھرُور، سری لنکا کے تخفیفِ اسلحہ کے امور کے ماہر جیانتھا دھانا پالا اور تھائی لینڈ کے قائم مقام وزیرِ اعظم سراکیارت ساتھی راتھائی بھی اِس عہدے کے لئے اُمیدوار ہیں۔

جرمنی نے ابھی کسی بھی اُمیدوار کی تائید نہیں کی جبکہ امریکہ فیورٹ اُمیدواروں سے الگ ایک اور ہی اُمیدوار یعنی اقوامِ متحدہ میں اُردن کے سفیر پرنس زَید الحسین کے بارے میں غور کر رہا ہے۔