1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

افغان جنگ میں شدت آ سکتی ہے: جنرل ڈیوڈ پیٹریاس

افغانستان میں تعینات غیر ملکی افواج کے نئے کمانڈر جنرل ڈیوڈ پیٹریاس نے کہا ہے کہ وہ افغانستان میں بڑھتے ہوئے تشدد کے پیش نظر جنگی حکمت عملی میں کچھ تکنیکی تبدیلیاں لانے پرغورکریں گے تاہم مجموعی حکمت عملی برقرار رہے گی۔

default

جنرل پیٹریاس نے افغان جنگ کی کمان سنبھالتے ہوئے کہا ہے کہ افغانستان میں جنگ جاری رہے گی اورآئندہ کچھ مہینوں کے دوران اس میں شدت آ سکتی ہے۔ منگل کو جنرل پیٹریاس نے سینیٹ کی آرمڈ فورسز کمیٹی کے سامنے اس یقین کا اظہار کیا کہ افغان جنگ میں پیش رفت ممکن ہے۔

اعلیٰ امریکی جنرل سٹینلے میک کرسٹل کے بے باک مگر متنازعہ بیانات کی وجہ سے انہیں افغانستان متعین غیر ملکی افواج کے کمانڈر کےعہدے سے ہٹا کراس پرجنرل پیٹریاس کو تعینات کیا گیا ہے۔

Senatorin Hillary Rodham Clinton im Gespräch mit General David Petraeus

جنرل پیٹریاس اور ہلیری کلنٹن

جنرل پیٹریاس نے سینیٹ کی کمیٹی کے سامنے یہ عہد کیا کہ وہ افغانستان میں سول قیادت کے ساتھ مل کر کام کریں گے۔ انہوں نے کہا کہ وہ افغانستان میں جنگی طریقہ ء کار کے متنازعہ امور پر غور کریں گے اور مناسب ہوا تو ان کا متبادل تجویز کریں گے۔ افغان شہری ہلاکتوں کے بچاؤ کے لئے امریکی فوج، فضائی یا بری کارروائی کے لئے کچھ حدود کی پابند ہیں تاہم ناقدین کا کہنا ہے کہ ان حدود کی وجہ سے وہاں امریکی فوجیوں کو سخت خطرات لاحق ہیں۔

جنرل پیٹریاس نے کمیٹی کو بتایا کہ افغانستان میں طالبان باغیوں کے خلاف جاری جنگ کے طریقہ ء کارمیں تبدیلیاں متوقع ہیں۔ انہوں نے کہا کہ دسمبر میں اس جنگ پر وائٹ ہاؤس کے جائزے کے بعد صورتحال واضح ہو جائے گی کہ مستقبل میں کیا تبدیلیاں ضروری ہیں۔

ستاون سالہ پیٹریاس نے کہا کہ وہ امریکی صدر باراک اوباما کے اس منصوبے کی حمایت کرتے ہیں جس کے تحت جولائی سن 2011ء سے افغانستان سے امریکی افواج کے انخلاء کا عمل شروع کردیا جائے گا تاہم انہوں نے اسے ایک عمل کی شروعات قرار دیا۔

McChrystal / USA / Militär

جنرل سٹینلے میک کرسٹل

افغانستان میں غیرملکی افواج کے کمانڈر کو ایسے وقت میں تبدیل کیا گیا ہے جب وہاں طالبان باغیوں کے خلاف جنگ ایک اہم مرحلے میں داخل ہو چکی ہے۔ کئی ناقدین کا خیال ہے کہ اس تبدیلی کے نتیجے میں افغانستان متعین غیر ملکی افواج کو مشکلات پیش آ سکتی ہیں تاہم عراق جنگ میں جنرل ڈیوڈ پیٹریاس کے وسیع تر کامیاب تجربے کو دیکھتے ہوئے امریکی انتظامیہ کا خیال ہے کہ اس تبدیلی سے افغانستان میں جاری عسکری کارروائی پر کوئی خاص فرق نہیں پڑےگا۔

رپورٹ: عاطف بلوچ

ادارت: شادی خان سیف

DW.COM