1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

افغانستان کی کرکٹ کے میدان میں ایک اور فتح

کرکٹ کے میدان میں افغانستان کی ٹیم کی فتوحات کا سلسلہ جاری ہے۔ بہت کم عرصے میں بین الاقوامی سطح پر شہرت پانے والی افغان ٹیم نے کینیڈا میں کھیلے گئے ایک روزہ میچ میں میزبان ٹیم کو دو وکٹوں سے شکست دی۔

default

یہ میچ بارش کے سبب مقررہ پچاس اوورز تک نہ کھیلا جاسکا۔ کینیڈا کی ٹیم ٹاس ہار کر پہلے بیٹنگ کرتے ہوئے 44 اعشاریہ 5 اوورز میں 230 رنز تک محدود رہی۔ کینیڈا کی ٹیم کو ان کے افتتاحی بلے بازوں نے شاندار آغاز فراہم کیا اور لگ رہا تھا کہ وہ بآسانی 300 کا مجموعہ عبور کر لیں گے۔ اوپنر ہیرال پٹیل اور رویندو گوناسیکرا کی شراکت میں پہلے 10 اوورز کے دوران 7 اعشاریہ پانچ رنز فی اوور کے حساب سے 75 رنز بنے۔ پٹیل نے 85 گیندیں کھیل کر 62 اور گوناسیکرا نے محض 40 گیندیں کھیل کر 57 رنز کی دھواں دھار اننگ کھیلی۔

یہ دونوں جیسے ہی آؤٹ ہوئے، افغان ٹیم نے کھیل پر اپنی گرفت مضبوط کر لی۔ ان کی نپی تلی باؤلنگ کے سامنے کینیڈا کی مڈل آرڈر نہ سنبھل سکی اور مقررہ اننگز کے پورے پچاس اوورز کھیلے بغیر ہی سارے بلے باز پویلین لوٹ گئے۔ افغانستان کی جانب سے محمد نبی کھیل پر چھائے رہے، جنہوں نے 31 اوورز میں چار وکٹیں لیں۔ ایک موقع پر کینیڈا کی سات وکٹیں محض 49 رنز پر گریں۔

افغان ٹیم کے لیے 231 رنز کے ٹارگٹ کو بارش کے سبب کم کیا گیا۔ انہیں جیت کے لیے 43 اوورز میں 213 رنز کا ہدف دیا گیا۔ مہمان ٹیم کی بیٹنگ کا آغاز بہت ہی خراب رہا۔ ان کے افتتاحی بلے باز نور علی زدران اور محمد شہزاد ایک ایک رن بنا کر آؤٹ ہوئے۔

Cricket Mannschaft Afghanistan

افغانستان کرکٹ ٹیم کے کھلاڑی تربیتی مشق کے دوران

تین اوورز میں افغانستان کے دو کھلاڑی سات کے مجموعے پر پویلین لوٹ چکے تھے۔ اس موقع پر کپتان نوروز منگل اور شبیر نوری نے اننگز کو سہارا دیا۔ منگل 34 رنز بنا کر پویلین لوٹے تو راز محمد نبی میدان میں اترے اور نوری کا خوب ساتھ دیا۔ دونوں کی شراکت میں چوتھی وکٹ کے لیے 114 رنز بنے۔ نوری نے گیارہ چوکوں اور دو چھکوں کی مدد سے 94 رنز بنائے مگر سینچری مکمل نہ کرسکے۔ راز محمد نے 58 رنز بنائے۔

اس جوڑی کے پویلین لوٹنے کے بعد افغان ٹیم کی بیٹنگ لائن ایک مرتبہ پھر لڑکھڑائی اور پانچ بلے باز محض 24 رنز جوڑ کر آؤٹ ہوئے۔ بالآخر سمیع اللہ شینواری اور میروئیس اشرف نے باقی ماندہ رنز بناکر جیت کو یقینی بنایا۔

رپورٹ: شادی خان سیف

ادارت: امجد علی

DW.COM