1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

افغانستان میں نیٹو کے تین فوجی ہلاک

مغربی دفاعی اتحاد کے ذرائع کے مطابق افغانستان میں دو مختلف واقعات میں نیٹو کے تین اور فوجی مارے گئے ہیں۔ نیٹو کے آج اتوار کو جاری کیے گئے ایک فوجی بیان کے مطابق یہ ہلاکتیں ہفتہ کے روز ہوئیں۔

default

اس بیان میں کہا گیا ہے کہ نیٹو کے ہلاک ہونے والے ان تین میں سے دو فوجی جنوبی افغانستان میں اس وقت مارے گئے جب وہ سڑک کے کنارے نصب کیے گئے ایک بم کی زد میں آ گئے۔ نیٹو ذرائع نے تاہم یہ واضح نہیں کیا کہ ہلاک ہونے والے ان فوجیوں کا تعلق کن ملکوں سے تھا۔

افغانستان میں زیادہ تر غیر ملکی اتحادی فوجی دستے ملک کے جنوب میں تعینات ہیں اور ان کا تعلق زیادہ تر امریکہ، برطانیہ اور کینیڈا سے ہے۔ اس سے پہلے نیٹو کا ایک تیسرا فوجی ہفتہ ہی کے روز اس وقت مارا گیا جب اتحادی دستوں کا ایک فوجی ہیلی کاپٹر ملک کے مشرق میں گر کر تباہ ہو گیا۔

مغربی دفاعی اتحاد کے ذرائع نے یہ تسلیم نہیں کیا کہ یہ ہیلی کاپٹر طالبان کے کسی حملے کے نتیجے میں تباہ ہوا۔ تاہم اتنا ضرور کہا گیا کہ اس ہیلی کاپٹر میں سوار دو فوجیوں کے بچانے کے لیے جو امدادی آپریشن کیا گیا، اس دوران ’دشمن کے ساتھ‘ فائرنگ کا تبادلہ بھی ہوا۔

Flash-Galerie Taliban legen Waffen nieder

طالبان نے نیٹو کا ہیلی کاپٹر مار گرانے کا دعویٰ کیا ہے

اس کے برعکس طالبان باغیوں نے دعویٰ کیا ہے کہ انہوں نے پہلے نیٹو کے ایک ہیلی کاپٹر کو مار گرایا اور پھر اس میں سوار فوجیوں کو بچانے کے لیے کیے جانے والے نیٹو ریسکیو آپریشن کو بھی اپنی کارروائی کا نشانہ بنایا۔

افغانستان کے جنوب میں اتحادی فوجوں اور افغان نیشنل آرمی کے ہزاروں سپاہیوں کو ان دنوں طالبان کے بڑھتے ہوئے حملوں کا سامنا ہے۔ افغانستان میں بین الاقوامی فوجی دستوں کو پہنچنے والے جانی نقصان کا ریکارڈ رکھنے والی ایک ویب سائٹ کا نام iCasualties.org ہے اور اس ویب سائٹ پر شائع کیے گئے تازہ ترین اعداد و شمار کے مطابق اس سال کے دوران ہندوکش کی اس ریاست میں اب تک 135 غیر ملکی فوجی ہلاک ہو چکے ہیں۔

رپورٹ: مقبول ملک

ادارت: شادی خان سیف

DW.COM

ویب لنکس