1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

اعجاز بٹ کی تنقید افسوسناک ہے، شاہد آفریدی

پاکستانی کرکٹ ٹیم کے سابق کپتان شاہد آفریدی نے اپنے ایک بیان میں کہا ہے کہ انہیں پاکستان کرکٹ بورڈ کے سربراہ اعجاز بٹ کی جانب سے ان کی کپتانی پر کی گئی تنقید پر انتہائی افسوس ہے۔

default

پاکستان کرکٹ بورڈ پی سی بی کے سربراہ اعجاز بٹ نے اپنے ایک حالیہ انٹرویو میں شاہد خان آفریدی پر الزام عائد کیا تھا کہ وہ رواں برس مئی میں ویسٹ انڈیز میں کھیلی جانے والی سیریز میں ٹیم کی ہار کا باعث بنے۔ آفریدی نے ہفتے کے روز ٹیلی فون پر خبر رساں ادارے AFP کو انٹرویو دیتے ہوئے کہا کہ بورڈ کے سربراہ کی جانب سے اس طرح کا بیان افسوسناک عمل ہے۔ ’’مجھے افسوس ہے کہ اس طرح کی چیزیں بورڈ کے سربراہ کی جانب سے سامنے آ رہی ہیں۔‘‘

آفریدی نے کہا کہ اعجاز بٹ نے خود انہیں ٹیم کا کپتان مقرر کیا تھا۔ ’’ماہرین سے لے کر شائقین تک ہر شخص میری قائدانہ صلاحیتوں اور ٹیم میں اتحاد پیدا کرنے پر میری تعریف کرتا ہے۔‘‘ انہوں نے مزید کہا کہ اس طرح کے بیانات ان کی شہرت کو نقصان پہنچانے کی ’مہم‘ کا حصہ ہیں۔

Ijaz Butt Pakistan Cricket

پاکستان کرکٹ بورڈ کے سربراہ اعجاز بٹ

جمعرات کے روز پاکستان کرکٹ بورڈ کے سربراہ اعجاز بٹ نے اپنے ایک ٹیلی وژن انٹرویو میں الزام عائد کیا تھا کہ آفریدی کی وجہ سے پاکستانی ٹیم ویسٹ انڈیز کے خلاف مئی میں کھیلی گئی ایک روزہ میچوں کی سیریز کا چوتھا اور پانچواں میچ ہاری تھی۔ اس موقع پر اعجاز بٹ کا کہنا تھا، ’جہاں تک میری رائے ہے، آفریدی پی سی بی کی نظر میں کپتانی کی اہلیت نہیں رکھتا۔‘

واضح رہے کہ ماضی قریب میں شاہد آفریدی کی جانب سے بار بار بین الاقوامی کرکٹ سے ریٹائرمنٹ کے اعلانات سامنے آتے رہے ہیں۔ انہوں نے متعدد مرتبہ کرکٹ بورڈ پر الزامات بھی عائد کیے ہیں کہ بورڈ سینئر کھلاڑیوں سے بدسلوکی کا مرتکب ہو رہا ہے۔

پاکستان کرکٹ بورڈ نے اس سے قبل آفریدی سے معاہدہ ختم کرتے ہوئے انہیں ملک سے باہر کرکٹ کھیلنے سے روک دیا تھا اور ساتھ ہی شاہد آفریدی کو ڈسپلنری کمیٹی کے سامنے پیش ہونے کی بھی ہدایت کی تھی۔

رپورٹ: عاطف توقیر

ادارت: مقبول ملک

DW.COM

ویب لنکس