1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

اسرائیلی ٹی وی اسٹار نے خودکشی کر لی

اسرائیل کے معروف ٹی وی اسٹار ڈوڈو ٹوپاز نے جیل میں خود کو پھانسی پر لٹکا کر ہلاک کر دیا ہے۔ ٹیلی ویژن پر تفریحی پروگراموں کے باعث شہرت حاصل کرنے والے ڈوڈو ٹوپاز کو جون میں گرفتار کیا گیا تھا۔

default

اسرائیلی جیل کے حکام نے اس خبر کی تصدیق کر دی ہے

ڈوڈو ٹوپاز پر الزام تھا کہ وہ حملہ کر کے اپنے چینل کے افسران کو ہلاک کرنا چاہتے تھے اور اس کے لئے وہ منصوبہ بندی میں مصروف تھےکیونکہ ٹوپاز کی جانب سے پیش کردہ کئی تجاویز کو ان افسران نے رد کر دیا تھا، جس پر ٹوپاز برہم تھے۔ ٹوپاز نے ان الزامات کی تردید کی تھی۔

62 سالہ ٹوپاز اسرائیل میں ٹی وی انڈسٹری میں مشہور ترین میزبان سمجھے جاتے تھے تاہم گزشتہ کچھ برسوں میں ان کا فنی سفر پے درپے مشکلات کا شکار رہا۔ ان کے کیریئر میں آنے والا زوال ان کے لئے ہمیشہ ذہنی دباؤ کا باعث رہا۔

اسرائیلی جیل کی جانب سے جاری کردہ بیان میں کہا گیا ہے کہ ٹوپاز نے جیل کی کوٹھری میں خود کو پھانسی دے دی ہے اور طبی عملے کی تمام تر کوششوں کے باوجود وہ زندہ نہیں بچ سکے۔

ٹوپاز کے علاوہ تین دیگر افراد کو بھی ٹی وی افسران پر حملوں کی منصوبہ بندی کے الزام میں گرفتار کیا گیا تھا۔

افسران پر حملوں کی منصوبہ بندی کوئی پہلا واقعہ نہیں تھا جب ٹوپاز کے حوالے سے کوئی تنازعہ پیدا نہیں ہوا۔ 2003 میں اپنے ٹی وی شو کے دوران ٹوپاز نے لاطینی امریکی ڈرامہ اداکار کے بازو پر دانت گاڑ دیے تھے۔ 1995 میں ان کے پروگرام کی خرابیوں کی نشاندہی پر انہوں نے ایک ناقد کو گلاس کھینچ مارا تھا۔

ٹوپاز کے وکیل زیون عامر نے اسرائیلی ریڈیو سے گفتگو کرتے ہوئے کہا : ’’ٹوپاز کے لئے ان کے مداحوں کی محبت ہمیشہ اہم رہی۔‘‘

زیون عامر کا کہنا ہے کہ گزشتہ دو ماہ سے وہ ہمیشہ یہی کہتے سنائی دئے: ’’میں ایک اچھا آدمی ہوں اور یہ سب کو پتہ چل جائے گا۔ میں وہ ہوں جو اچھے کام کرتا ہے۔‘‘

رپورٹ : عاطف توقیر

ادارت : گوہر گیلانی