1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

اداکاری و سفارتکاری کے بعد انجلینا جولی اب ’پروفیسر‘

ہالی وڈ کی معروف اداکارہ انجلینا جولی پِٹ لندن کے ایک تعلیمی ادارے میں ایک خاص مضمون کی استاد بن رہی ہیں۔ وہ لندن اسکول آف اکنامکس کی اگلے برس فیکلٹی ممبر بن جائیں گی۔

default

ہالی وڈ کی مشہور اداکارہ انجلینا جولی پِٹ

دنیا میں پہلی مرتبہ ’ خواتین، امن اور سکیورٹی‘ نام کا خاص مضمون متعارف کرانے کا سہرا لندن اسکول آف اکنامکس (LSE) کو حاصل ہو رہا ہے۔ اِس خاص مضمون کو پڑھانے کے لیے ایک انتہائی خاص ٹیچر کا بندوبست کیا گیا ہے۔

یہ ٹیچر ہالی وڈ کی مشہور اداکارہ انجلینا جولی پِٹ ہیں۔ وہ اگلے برس سے لندن کی اِس انتہائی معتبر تعلیمی درسگاہ کی فیکلٹی کی رکن بن رہی ہیں۔ امریکی اداکارہ اقوام متحدہ کے مہاجرین کے ادارے (UNHCR) کی خصوصی سفیر بھی ہیں۔ ہالی وڈ کے مایہ ناز اداکار بریڈ پِٹ ان کے شوہر ہیں۔

’ویمن، پیس اور سکیورٹی‘ مضمون کا تصور گزشتہ برس برطانیہ کے سابق وزیر خارجہ لارڈ ولیم ہیگ نے انجلینا جولی کے ساتھ ایک ملاقات کے بعد پیش کیا تھا۔ لندن اسکول آف اکنامکس میں لارڈ ہیگ بھی جزوقتی استاد کے طور پر اِس مضمون کے مختلف پہلووں پر لیکچر دیں گے۔

اِن دونوں احباب کے علاوہ بھی کم از کم دو ماہرین کو جز وقتی استاد کے طور پر شامل کرنے کا عندیہ ایل ایس ای نے دیا ہے۔ یہ مہمان لیکچرر خصوصی ورکشاپ کے ساتھ ساتھ اسٹوڈنٹس کے ہمراہ خصوصی تقریبات میں بھی شریک ہوں گے۔

Logo der London School of Economics

لندن اسکول آف اکنامکس دنیا کا ایک معتبر تعلیمی ادارہ ہے

لندن اسکول آف اکنامکس کے اِس خصوصی کورس کے شروع کرنے اور اُس کی ٹیچر مقرر کیے جانے پر انجلینا جولی نے تبصرہ کرتے ہوئے کہا کہ یہ ایک انتہائی اہم موضوع ہے کیونکہ اِس میں وسعت دینے سے خواتین کے حقوق کی آگہی سے عورتوں کے خلاف جرائم اور تنازعات والے علاقوں میں جنسی تشدد کی مذمت کے ساتھ ساتھ اِس میں کمی کا امکان پیدا ہو سکتا ہے۔

جولی نے مسرت کے ساتھ کہا کہ وہ اِس مضمون کے لیے شریک طلبا کو پڑھانے کی منتظر ہیں اور اِس میں وہ اپنے تجربات سے بھی انہیں مستفید کریں گی۔

اقوام متحدہ کی ریفیوجی ایجنسی (UNHCR) کی خصوصی سفیر نے اپنے بیان میں مزید واضح کیا کہ وہ امید کرتی ہیں کہ یہ ایک ابتدا ہے اور اِس مضمون کو دوسرے ملکوں کے تعلیمی ادارے بھی متعارف کرانے کا سلسلہ شروع کریں گے۔ آسکر ایوارڈ یافتہ اداکارہ اور برطانیہ کے سابق وزیر خارجہ لارڈ ہیگ نے مشترکہ طور پر سن 2012 سے تنازعات والے علاقوں میں جنسی تشدد روکنے کی مہم بھی شروع کر رکھی ہے۔

وہ اِس تحریک کے ذریعے جنسی تشدد کے مرتکب افراد کو انصاف میں کٹہرے میں کھڑا کرنے کی آواز بلند کیے ہوئے ہیں۔ دو برس قبل انہی دونوں شخصیات نے جنگی علاقوں میں جنسی زیادتی کے موضوع پر ایک سمٹ کا بھی اہتمام کیا تھا۔

لندن اسکول آف اکنامکس کے مضمون ’خواتین، امن اور سلامتی‘ کے لیے داخلے کا سلسلہ رواں برس اگست میں شروع ہو رہا ہے۔