1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

اداکارہ Milla Jovovich پھر سے شادی کے بندھن میں

بائیس اگست ہفتے کے روز ہالی وُڈ کی مشہور اداکارہ ملا یووو وچ اور ہدایتکار پال اینڈرسن رشتہء ازدواج میں بندھ گئے۔

default

44 سالہ برطانوی فلم ساز اور ہدایتکار پال اینڈرسن کے ساتھ ملا یووو وچ کی پہلی ملاقات سن 2001ء میں فلم ’’ریزیڈینٹ اِیوَل‘‘ کے سَیٹ پر ہوئی تھی۔ تب اینڈرسن اِس فلم کی ہدایات دے رہے تھے۔ یہی فلم بعد میں ملا یووو وچ کی شہرت کا باعث بنی۔

مشہور وَیب سائٹ پیپل ڈاٹ کوم کے مطابق دونوں کی شادی بیورلی ہلز میں اُن کے گھر کے باہر منعقدہ ایک چھوٹی سی تقریب میں ہوئی، جس میں اُن دونوں کی بیس ماہ کی بیٹی ایور گابو بھی شریک تھی۔ مجموعی طور پر محض کوئی پچاس مہمان اِس تقریب میں مدعو تھے۔ ان مہمانوں میں ممتاز اداکار پیٹرک ڈیمپسی بھی اپنی اہلیہ جولیان کے ساتھ موجود تھے۔ یووو وچ نے کچھ عرصہ پہلے ہی واضح کر دیا تھا کہ اُن کا محض اپنے قریبی دوستوں اور عزیزوں کو ہی اِس تقریب میں مدعو کرنے کا پروگرام ہے۔

Milla Jovovich

33 سالہ ملا یووو وچ بنیادی طور پر یوکرائن سے تعلق رکھتی ہیں

شادی کے موقع پر دلہن نے ساٹھ کے عشرے میں رائج فیشن کے انداز کا ایک مختصر لباس پہن رکھا تھا۔ تقریب کے بعد مہمانوں کو استقبالیہ دیا گیا، جس میں کیوبا کے موسیقاروں نے کیوبا کے روایتی انداز میں ڈرمز بجائے۔

ملا یووو وچ کی یہ تیسری شادی ہے۔ 1992ء میں اپنی پہلی شادی کے وقت وہ محض سولہ برس کی تھیں۔ یہ شادی فوراً بعد ہی ختم ہو گئی تھی۔ 1999ء میں یووو وچ ’’دا ففتھ ایلیمنٹ‘‘ جیسی منفرد فلم بنانے والے ہدایتکار لُوک بیساں کی شریکِ حیات بنیں۔ یہ شادی بھی محض دو سال برقرار رہی تھی۔

Der italienische Designer Giorgio Armani mit Model Milla Jovovich

اطالوی ڈیزائنر گیورگیو ارمانی اور ملا یووو وچ کی ایک یادگار تصویر

شادی سے پہلے پیپل ڈاٹ کوم سے باتیں کرتے ہوئے ملا یووو وچ نے کہا تھا کہ ایک بچے کی ماں بننے کے بعد اُن کی زندگی مکمل طور پر تبدیل ہو گئی ہے۔ اب وہ اپنے کیریئر کی پروا نہیں کرتیں اور نہ ہی یہ سوچتی ہیں کہ دوسرے لوگ اُن کے بارے میں کیا کہتے ہوں گے۔ یووو وچ نے کہا تھا کہ بچہ اور اُن کا کنبہ ہی اب اُن کی اوّلین ترجیح ہے۔ یووو وچ کے مطابق اُنہوں نے گھر میں ایک اکیلے بچے کے طور پر پرورش پائی اور اب وہ یقینی طور پر مزید بچوں کی خواہاں ہیں کیونکہ وہ ایک بڑے گھرانے کا خواب رکھتی ہیں۔

ہالی وُڈ کی اِس اداکارہ کو آج کل اُس کی تازہ ترین فلم ’’اے پرفیکٹ گَیٹ اَوے‘‘ میں دیکھا جا سکتا ہے، جو سات اگست کو ہی ریلیز ہوئی ہے۔ اینڈرسن کی اب تک آخری فلم ’’ڈَیتھ ریس‘‘ تھی، جو گذشتہ سال منظرِ عام پر آئی۔ اِس کی کہانی بھی اُنہوں نے خود لکھی اور ہدایات بھی خود ہی دی تھیں۔

رپورٹ: امجد علی

ادارت: ندیم گِل