1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

آسٹریلین اوپن: روجر فیڈرر چوتھے مرحلے میں

آسٹریلیا میں جاری سال کے پہلے گرینڈ سلیم، آسٹریلین اوپن میں راجر فیڈرر چوتھے مرحلے تک رسائی میں کامیاب ہو گئے ہیں۔ اس راؤنڈ میں ان کے مدمقابل آسٹریلوی سٹار کھلاڑی لیٹن ہیوئٹ ہوں گے۔

default

عالمی نمبر ایک کھلاڑی روجر فیڈرر

تیسرے راؤنڈ میں ہیوئٹ کو قبرص کے کھلاڑی مارکوس باغتا دِیس کے مقابلے پر چھ صفر اور چار دو کی برتری حاصل تھی، جب باغتا دِیس نے زخمی ہو جانے کی بناء پر مقابلے سے دستبردار ہو جانے کا اعلان کر دیا۔

دوسری جانب فیڈرر نے اسپین کے البیئر مونتانیس کو چھ تین، چھ چار اور چھ چار سے شکست دی۔ آسٹریلین اوپن کے کسی میچ میں فیڈرر کی یہ 50 ویں کامیابی تھی۔ تین مرتبہ آسٹریلین اوپن جیتنے والے اور گزشتہ برس فائنل تک پہنچنے والے فیڈرر کو میلبورن کے اِس ٹورنامنٹ میں اب تک صرف سات میچوں میں شکست کا سامنا کرنا پڑا ہے۔

Kim Clijsters US Open Tennis Trophäe

بیلجیئم کی کم کلائٹرز یو ایس اوپن ٹرافی چومتے ہوئے، آسٹریلین اوپن میں غیر متوقع طور پر ابتدائی راؤنڈز ہی میں مقابلے سے خارج ہو گئیں

اپنے ایک انٹرویو میں فیڈرر نے انکشاف کیا کہ نوعمری میں اُنہوں نے ترک وطن کر کے آسٹریلیا میں آباد ہو جانے کا سوچا تھا۔ فیڈرر، جن کی والدہ کا تعلق جنوبی افریقہ سے ہے، سوئٹزرلینڈ میں پیدا ہوئے تھے اور سوئٹزرلینڈ کے پرچم تلے اب تک پندرہ گرینڈ سلیم ٹورنامنٹ جیت چکے ہیں۔

ہیوئٹ اور فیڈرر کی طرح سیربیا کے نوواک ڈیوکووِچ اور روس کےنکولائی داوی دَینکو بھی کوئی سیٹ ہارے بغیر اگلے راؤنڈ میں پہنچ گئے ہیں۔

خواتین کھلاڑیوں میں بیلجیئم سے تعلق رکھنے والی اور یو ایس اوپن کی فاتح کھلاڑی کم کلائسٹرز غیر متوقع طور پر مقابلے سے خارج ہو چکی ہیں لیکن امریکہ کی ولیمز سسٹرز اپنے میچ جیت کر چوتھے راؤنڈ میں پہنچ گئی ہیں۔

سیرینا ولیمز نے اسپین کی کارلا سواریس کو چھ صفر اور چھ تین سے شکست دی جبکہ وینس ولیمز نے آسٹریلیا کی کیسی ڈیلاکوآ کو چھ ایک اور سات چھ سے ہرایا۔

رپورٹ : امجد علی

ادارت : عاطف توقیر