1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

آسٹریلین اوپن، دیل پوترو ایونٹ سے باہر

میلبورن میں جاری رواں برس کے پہلے گرینڈ سلیم آسٹریلین اوپن کے سلسلے میں اتوار کے روز ہونے والے مقابلوں میں نتائج خاصے غیر متوقع رہے۔ یو ایس اوپن کا اعزاز جیتنے والے دیل پوترو ایک اپ سیٹ شکست کے بعد ایونٹ سے باہر ہوگئے۔

default

دیل پوترو کو مارِین چیلِچ نے شکست دی

ارجنٹائن کے عالمی درجہ بندی میں پانچویں نمبر کے کھلاڑی خوآن مارٹن دیل پوترو کو کروشیا کے عالمی درجہ بندی میں چودہویں نمبر کے کھلاڑی مارِین چیلِچ نے پانچ سات، چھ چار، سات پانچ، پانچ سات اور چھ تین سے ہرا دیا۔ دیل پوترو نے کہا کہ وہ بہت تھک چکے ہیں اور اپنے وطن ارجنٹائن جا کر ڈاکٹروں سے اپنے زخموں کا معائنہ کروائیں گے۔

دیل پوترو ہی کی طرح تھکن سے نڈھال تھیں، فرینچ اوپن چیمپئن روسی کھلاڑی سویتلانہ کزنیٹسوووا بھی، جنہیں اپنی ہی ہم وطن کھلاڑی نادیہ پیٹرووا کے ہاتھوں چھ تین، تین چھ اور چھ ایک سے شکست اٹھانا پڑی۔

آج کے دیگر کوارٹر فائنل میچوں میں اسپین کے چھ گرینڈ سلیم ٹائیٹل جیتنے والے رافائیل نادال نے کروشیا کے اِیوو کارلووِچ کو شکست دی۔ سیمی فائنل میں نادال کا مقابلہ اینڈی مرے کے ساتھ ہو گا، جو گزشتہ پچیس برسوں میں آسٹریلین اوپن کے کوارٹر فائنل تک پہنچنے والے پہلے برطانوی کھلاڑی تھے اور جنہوں نے آج امریکہ کے جون اِیسنر کو شکست سے دو چار کیا۔ مرے اور نادال کے درمیان اب تک ہونے والے نو میچوں میں سے سات میں نادال کو فتح حاصل ہوئی۔

رپورٹ : امجد علی

ادارت : عاطف توقیر