1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

آسام میں چھ باغی ہلاک کر دیے گئے، پولیس

بھارتی سکیورٹی فورسز نے ریاست آسام میں ایک کارروائی کرتے ہوئے چھ مشتبہ علیحدگی پسندوں کو ہلاک کر دیا ہے۔ پولیس نے بتایا ہے کہ یہ جھڑپ آج بروز جمعہ ایک دور دراز علاقے میں ہوئی۔

خبر رساں ادارے اے ایف پی نے بھارتی پولیس کے حوالے سے بتایا ہے کہ شمال مشرقی ریاست آسام کے ایک دور افتادہ علاقے میں باغیوں کے خلاف یہ کارروائی مخبری پر کی گئی۔ بتایا گیا ہے کہ اطلاع ملی تھی کہ علیحدگی پسند گروہ ’کربی پیپلز لبریشن ٹائیگرز‘ KPLT کے جنگجو ایک مقام پر چھپے ہوئے ہیں۔

پولیس کے مطابق اس مخبری پر سکیورٹی فورسز نے چھاپہ مار کارروائی کی تو شدت پسندوں نے فائرنگ شروع کردی، جس کے باعث ایک باقاعدہ مسلح تصادم شروع ہو گیا۔

مقامی پولیس اہلکار دیبجیت دیوری نے بذریعہ ٹیلی فون اے ایف پی کو بتایا کہ اس کارروائی کے نتیجے میں چھ جنگجو مارے گئے، جن میں KPLT کے دو اہم رہنما بھی شامل تھے۔

بھارتی ریاست آسام میں یہ باغی کربی نسل کے لیے ایک آزاد ریاست کے قیام کی خاطر مسلح تحریک چلا رہے ہیں۔ دیوری نے اس کارروائی کی تفصیلات بتاتے ہوئے کہا کہ ہلاک شدہ باغیوں کے ٹھکانے سے جدید اسلحہ بھی برآمد کر لیا گیا ہے۔ انہوں نے کہا کہ اس جھڑپ میں ایک فوجی زخمی بھی ہوا، جیسے ہسپتال میں طبی امداد دی جا رہی ہے۔

شمال مشرقی بھارت میں گزشتہ کئی عشروں سے نسلی بنیادوں پر علیحدگی پسندی کی تحریکیں جاری ہیں۔ اس علاقے میں درجنوں قبائلی گروہ نئی دہلی حکومت کے خلاف گوریلا کارروائیاں بھی سر انجام دے رہے ہیں۔ یہ گروہ نہ صرف وفاق کے بلکہ ایک دوسرے کے خلاف بھی پرتشدد کارروائیاں کرتے رہتے ہیں۔

Indien Assam Flüchtlinge 24.12. ethnische Auseinandersetzung Angriffe

شمال مشرقی بھارت میں گزشتہ کئی عشروں سے نسلی بنیادوں پر علیحدگی پسندی کی تحریکیں جاری ہیں

اگست میں ہی آسام میں نیشنل ڈیموکریٹک فرنٹ آف بودولینڈ کے باغیوں نے ایک مصروف مارکیٹ میں فائرنگ کر کے پندرہ افراد کو ہلاک کر دیا تھا۔ اس پرتشدد حملے کے نتیجے میں متعدد افراد زخمی بھی ہو گئے تھے۔

ملتے جلتے مندرجات