ترکی پاک بحریہ کو چار طیارہ شکن جنگی بحری جہاز فروخت کرے گا

ترکی کی سرکاری نیوز ایجنسی انادولو کے مطابق یہ بات ترک وزیر دفاع نورالدین جانیکلی نے اپنے مونٹینیگرو کے دورے کے درمیان کہی۔ انادولو نے اپنی رپورٹ میں جانیکلی کا حوالہ دیتے ہوئے لکھا ہے کہ طیارہ شکن بحری جہاز ترکی دفاعی صنعت میں تاریخ کی سب سے بڑی برآمد ہے۔

دوسری جانب پاکستانی بحریہ کے ایک اہلکار نے بھی ترک وزیر دفاع کے اس بیان کی تصدیق کرتے ہوئے کہا ہے کہ اسلام آباد حکومت نے ترکی سے چار ’میلگیم بلاک ون کلاس‘ طیارہ شکن بحری جہازوں کا سودا کیا ہے۔ تاہم یہ وضاحت نہیں کی گئی کہ اس سودے کی مالیت کتنی ہے۔

'میلگیم‘ طیارہ شکن بحری جہاز بنانے کا ترکی کا مقامی پروگرام ہے۔

پاک بحریہ کے اہلکار نے یہ بھی بتایا کہ یہ طیارہ شکن توپ بردار جنگی بحری جہاز جدید اور خفیہ طرز کی اینٹی سب میرین ٹیکنالوجی سے لیس ہیں اور یہ کہ پاکستانی نیوی ان بحری جہازوں پر جدید اور روایتی دونوں طرز کے میزائل نصب کرنے کی اہل ہے۔

اطلاعات ہیں کہ نناوے اعشاریہ پانچ ملین لمبے ایسے پہلے دو جنگی بحری جہاز استنبول نیوی کے شپ یارڈ میں بنائے جائیں گے جبکہ باقی دو پاکستان میں کراچی کی جنوبی بندرگاہ پر تعمیر کیے جائیں گے۔

ص ح/ ع ح / نیوز ایجنسی