افغان مہاجر کو غلطی سے ملک بدر کیا، جرمنی واپس لایا جائے گا

یہ بیس سالہ افغان مہاجر جرمنی سے رواں ماہ کے آغاز میں ملک بدر کیے گئے ان انہتر افغان مہاجرین میں سے ایک تھا جن کی ملک بدری کا ذکر کرتے ہوئے مہاجرین کے بارے میں سخت پالیسیوں کے حامی ملکی وزیر داخلہ ہورسٹ زیہوفر نے کہا تھا کہ ان مہاجرین کو وزیر داخلہ کی انہترویں سالگرہ کی مناسبت سے ملک بدر کیا جا رہا ہے۔

آج اٹھارہ جولائی بروز بدھ نیوز ایجنسی ڈی پی اے سے گفتگو کرتے ہوئے وفاقی وزارت داخلہ کے ترجمان ایلیونورے پیٹرمان کا کہنا تھا کہ بی اے ایم ایف کے اہلکار غلطی سے ملک بدر کیے گئے افغان تارک وطن کو واپس جرمنی لانے کے لیے ’ضروری اقدامات‘ کر رہے ہیں۔ اس نوجوان افغان شہری کی جرمنی میں سیاسی پناہ کی درخواست زیر سماعت ہونے کے باوجود فیصلے سے قبل ہی جرمنی سے واپس افغانستان بھیج دیا گیا تھا۔

وزیر داخلہ ہورسٹ زیہوفر کا کہنا ہے کہ انہیں اس غلطی کا علم نہیں تھا اور درحقیقت وفاقی ریاست میکلن برگ فورپومرن میں بی اے ایم ایف کی مقامی شاخ کے اہلکاروں نے اس کی شناخت کرنے میں غلطی کی تھی۔

زیہوفر کو افغان مہاجرین کی ملک بدری کے فیصلے کے بعد شدید دباؤ کا سامنا ہے۔ اپنی انہترویں سالگرہ کی مناسبت سے افغان مہاجرین کی ملک بدری کا بیان زیہوفر کے لیے اس وقت مزید پریشانی کا سبب بن گیا تھا جب اس سے اگلے ہی روز ان مہاجرین میں سے ایک تئیس سالہ نوجوان نے کابل میں خودکشی کر لی تھی۔ اس نوجوان کی ہلاکت کے بعد وزیر داخلہ سے مستعفی ہونے کا مطالبہ بھی کیا جا رہا تھا۔

ش ح / ا ا (ڈی پی اے)