آسٹریلین اوپن، فیڈرر نے بیسواں گرینڈ سلام ٹائٹل جیت لیا

اتوار اٹھائیس جنوری کے روز آسٹریلوی شہر میلبورن میں کھیلے گئے آسٹریلین اوپن کے فائنل میں سوئس کھلاڑی راجر فیڈرر نے پانچ سیٹوں کے مقابلے میں مارین چلچ کو چھ دو، چھ سات، چھ تین، تین چھ اور چھ ایک سے مات دی۔

آسٹریلین اوپن: ووزنیاکی نے چیمپیئن شپ جیت لی

راجر فیڈرر آٹھویں مرتبہ ومبلڈن ٹائٹل جیتنے والے پہلے کھلاڑی

راجر فیڈرر نے اٹھارہواں گرینڈ سلَیم ٹائٹل جیت لیا

تین گھنٹے سے زائد دورانیے کے اس میچ میں کروشیا کے کھلاڑی چلچ نے دفاعی چیمپئن فیڈرر کو سخت مزاحمت دکھائی لیکن فیڈرر کے تجربے کے آگے چلچ آخر کار بے بس ہو گئے۔

فیڈرر اور عالمی نمبر چھ چلچ کے مابین یہ نواں میچ تھا۔ چلچ ان میچوں میں سے فیڈرر کو صرف ایک ہی میچ میں شکست دینے میں کامیاب ہوئے ہیں۔ سن دو ہزار چودہ میں چلچ نے یو ایس اوپن کے فائنل میں فیڈرر کو ہرا کر یہ ٹائٹل اپنے نام کیا تھا۔ تب چلچ نے اپنے کیریئر کا پانچواں گرینڈ سلام ٹورنامنٹ جیتا تھا۔ انتیس سالہ چلچ کا یہ پہلا آسٹرین اوپن فائنل تھا۔

میچ کے بعد راجر فیڈرر نے کہا کہ وہ اس کامیابی پر بہت خوش ہیں، ’’میں بہت زیادہ خوش ہوں۔ یہ ناقابل یقین ہے۔ آج کا دن کافی طویل تھا۔ اب مجھے خوشی ہے کہ یہ ختم ہو گیا ہے۔‘‘ انہوں نے چلچ کے کھیل کی تعریف بھی کی اور کہا کہ انہوں نے عمدہ کھیل پیش کیا۔

فیڈرر کا یہ تیسواں گرینڈ سلام فائنل تھا۔ اس میچ سے قبل صرف سرب کھلاڑی نوواک جوکووچ اور آسٹریلین لیجنڈ روئے ایمرسن کو اعزاز حاصل تھا کہ انہوں نے آسٹریلین اوپن کا ٹائٹل چھ چھ مرتبہ اپنے نام کر رکھا تھا۔ تاہم اب فیڈرر نے اس برس کے پہلے گرینڈ سلام ٹورنامنٹ میں چلچ کو شکست دے کر چھٹی مرتبہ آسٹریلین اوپن جیت کر یہ ریکارڈ بھی برابر کر دیا ہے۔

اس کامیابی کے نتیجے میں فیڈرر اب تک صرف خواتین کھلاڑیوں مارگریٹ کورٹ، سیرینا ولیمز اور اسٹیفی گراف کے ناموں پر ہی مشتمل اس فہرست میں شامل ہو گئے ہیں، جنہوں نے سنگل مقابلوں میں بیس مرتبہ گرینڈ سلام ٹورنامنٹ جیتا ہے۔ فیڈرر کے علاوہ آج تک کوئی مرد کھلاڑی اتنے گرینڈ سلام ٹائٹل نہیں جیت پایا۔ فیڈرر اپنے طویل کیریئر میں مجموعی طور پر آٹھ وملبڈن ٹائٹل، پانچ یو ایس اوپن ٹائٹل، چھ آسٹریلین اوپن ٹائٹل اور ایک فرنچ اوپن ٹائٹل اپنے نام کر چکے ہیں۔