یورو پول کے 15 سال

یورپول یورپی یونین کی 27 رکن ملکوں کی پولیس کا ایک طرح سے خبروں اورمعلومات کےذخیرہ اورتبادلے کا مرکز ہے۔ ہالینڈ کے شہردی ہیگ میں قائم اس ادارے کے جرمن سربراہ ماکس پیٹرراٹسل نے بتایا:’’مجھے یوروپول کا سب سے بڑا فائدہ یہ نظرآتا ہے کہ ہم نےمتعدد ملکوں کو ایک مرکز تلے جمع کر دیا ہے۔ اب ہمیں معلومات اکھٹی کرنے کے لئے الگ الگ ملکوں سے رابطہ قائم کرنے کی ضرورت نہیں رہی بلکہ ایک ہی آفس میں مختلف ملکوں کے نمائندوں سے بات چیت کرکے مطلوبہ مقصد فوراً حاصل کیا جا سکتا ہے۔‘‘

یوروپول کا ادارہ تیزی سے وسعت اختیار کرتا جا رہا ہے۔ 1994 میں جب اس کا قیام عمل میں لایا گیا تھا تواس وقت عملے کی تعداد چند پولیس حکام، کسٹم کے چند اہلکاروں اور چند سرحدی محافظین پرمشتمل تھی۔ آج پندرہ سال بعد عملے کی تعداد 600 سے تجاوز کرچکی ہے۔

نہ صرف عملہ بلکہ اس ادارے کے فرائض کا دائرہ کار بھی بڑھ چکا ہے۔ شروع میں اس کا کام منشیات کے خلاف جنگ اور کالے دھن کو سفید دھن میں تبدیل کرنے والوں کا تعاقب کرنا تھا۔ دریں اثنا مختلف طرح کے منظم جرائم کی سرکوبی اس کے فرآئض میں شامل ہے۔ ان دنوں یورپول بچوں کی جنسی فلمیں بنانے والے نیٹ ورک اور دہشت گردی کے ٹھکانوں کا پتہ چلانے میں سرگرم عمل ہے۔

اس بارے میں راٹسل نے بتایا:’’یورپی یونین کی صرف کسی ایک ریاست پرہی ساری توجہ مرکوز کرنا غلط ہے۔ کیوں کہ ہم نہیں جانتے کہ کس ملک میں منصوبہ بندی ہورہی ہوتی ہے۔ کہاں سے مالی معاونت ہورہی ہوتی ہے۔ کہاں سے ہمدردیاں حاصل کی جا رہی ہوتی ہیں۔ یہ ساری معلومات ہم اکٹھی کرتے ہیں تا کہ شدید خطرات کی صورت میں پیشگی بچاؤ کی تدابیر اختیارکی جا سکیں۔‘‘

دوسری جانب یورپ کی تحفظ ڈیٹا تنظیموں کو یوروپول سے شکایت ہے۔ ان کا کہنا ہے کہ یہاں جمع ہونے والی شخصی معلومات ایسے اداروں یا شخصیات تک بھی پہنچ سکتی ہیں جنہیں یہ معلومات حاصل کرنے کا قانوناً حق حاصل نہیں ہوتا۔