کم ڈکار لینے والی گائے کی پیدائش کی کوششیں

کینیڈا کے ماہرین ماحولیات کے مطابق فضا میں شامل ہونے والی کُل میتھین گیس کا تین چوتھائی گائیوں کی وجہ فضا میں شامل ہوتا ہے، اور اس میں سے زیادہ تر میتھین گیس گائیوں کے ڈکار میں خارج ہوتی ہے۔ تحفظ ماحول پر کام کرنے والے سائنسدانوں کے مطابق میتھین گیس ماحول کے لئے کاربن ڈائی آکسائیڈ کی نسبت بیس گنا زیادہ خطرناک ہوتی ہے۔

کینیڈا کی ایلبرٹا یونیورسٹی کے پروفیسر اسٹیفن مُور Stephen Moore ایسے جین پرتحقیق کررہے ہیں جو گائے کے معدے میں میتھین گیس پیدا کرنے کا باعث بنتا ہے۔ ان کی اس تحقیق کا مقصد ایسی گائیں پیدا کرنا ہے جو ماحول کے لئے کم نقصان دہ ہونے کے ساتھ ساتھ گوشت اور دودھ کی فراہمی میں زیادہ فائدہ مند ہوں۔

کینیڈا کے شہرایڈمینٹن Edmonton میں ایلبرٹایونیورسٹی کے زرعی اور خوراک سے متعلق تحقیق کے شعبے کے پروفیسر مُور کی ایک حالیہ تحقیق میں ایسی گائیوں کی پیدائش کے سلسلے میں ابتدائی تجربات مکمل کرلئے گئے ہیں جو 25 فیصد کم میتھین کے اخراج کا سبب بنیں گی۔

پروفیسرمُورکے مطابق ایسی گائیوں کو دی جانے والی زیادہ تر خوراک ان کے جسم کا حصہ بن جائے گی۔ لہذا ایسی گائیں کم ڈکار لیں گی جس کی وجہ سے 25 فیصد کم میتھین گیس فضا مین شامل ہوگی۔

اب تک میتھین گیس کے اخراج میں کمی کے لئے دودھ اور گوشت کے لئے پالے جانے والے جانوروں کو ایسی خوراک دی جاتی ہے جس میں زیادہ خوردنی تیل شامل ہو تا ہے۔ ایسی خوراک گھاس وغیرہ کے مقابلے میں کم خمیر پزیر ہوتی ہے جس سے میتھین سمیت ماحول کے لئے دیگر نقصان دہ گیسیں کم پیدا ہوتی ہیں۔

گائیوں پر تحقیق کرنے والے ایک امریکی فارم کی ترجمان نینسی ہرشبرگ Nancy Hirshberg کے مطابق اگر امریکی میں موجود ہر ڈیری فارم میتھین گیس کے اخراج میں 12 فیصد تک کمی کرلے تواس سے فضائی آلودگی میں اتنی ہی کمی واقع ہوگی جتنی پانچ لاکھ کاروں کو سڑکوں سے ہٹالینے سے۔

رپورٹ : افسراعوان

ادارت : عاطف توقیر