ڈائملر نے امریکہ کے الزامات قبول کر لئے

امریکی محکمہ انصاف کے مطابق ڈائملر اور اس کی تین ذیلی کمپنیوں نے ’فارن کرپٹ پریکٹسس ایکٹ‘ FCPA سے متعلقہ الزامات پر مصالحت کر لی ہے۔ اس ایکٹ کے تحت دنیا بھر میں ڈائملر مصنوعات کی فروخت کے حوالے سے تفتیش کی گئی۔

امریکی ضلعی عدالت کے ایک جج رچرڈ لیون نے جمعرات کو واشنگٹن میں مقدمے کی سماعت کے دوران ادائیگیوں کی منظوری دے دی۔ جج نے مصالحتی معاہدہ منظور کرتے ہوئے تسلیم کیا کہ یہ ’انتہائی پیچیدہ معاملہ‘ تھا۔

امریکی محکمہ انصاف نے ایک اعلامئے میں بتایا، ’ڈائملر اے جی کی روسی ذیلی کمپنی ڈائملر کرائسلر آٹوموٹو رشیا، جسے اب مرسڈیز بینز رشیا کہا جاتا ہے، اور اس کی جرمن ذیلی کمپنی ایکسپورٹ اینڈ ٹریڈ فنانس نے رشوت ستانی کے الزامات قبول کئے ہیں۔

عدالت میں امریکی حکومت کی طرف سے شریک استغاثہ جان ڈارڈین نے جرمن کارساز ادارے کے ان اقدامات کو ضوابط کی بڑی خلاف ورزی قرار دیا۔ انہوں نے کہا کہ یوں کمپنی کے خلاف سنایا گیا فیصلہ سزاؤں کے وفاقی قواعد سے کم ہے۔ تاہم انہوں نے یہ بھی کہا کہ اس حوالے سے ڈائملر نے بہت تعاون کیا ہے اور اپنا گریبان صاف کرنے کی بہت کوشش کی۔ انہوں نے کہا کہ اس سے ڈائملر کی جانب سے رویے کی سنجیدہ تبدیلی ظاہر ہوتی ہے، جس کے لئے اسے سراہا جانا چاہئے۔

ایسا ہی ایک مقدمہ ڈائملر پر امریکی سیکیورٹیز اینڈ ایکسچینج کمیشن نے بھی دائر کیا۔ اس مقدمے کو نمٹانے کے لئے کمپنی نے 91 ملین ڈالر سے زائد کی ادائیگی پر آمادگی ظاہر کی ہے۔

رپورٹ: ندیم گِل

ادارت: عابد حسین