چین کا متنازعہ ڈاگ مِیٹ فیسٹیول، کتے کا گوشت مقبول خوراک
متعدد مظاہروں اور عالمی سطح پر تنقید کے باوجود چین کے جنوبی شہر یولن میں سالانہ ’ڈاگ میِٹ فیسٹیول‘ منعقد کیا جا رہا ہے۔ یہاں کے رہنے والوں کا کہنا ہے کہ کتے کا گوشت کھانا اُن کی روایات کا حصہ ہے۔
تہوار کا آغاز
چین کے ایک چھوٹے شہر یولن میں ’لیچی اینڈ ڈاگ میٹ فیسٹیول‘ ہر سال موسم گرما میں منعقد کیا جاتا ہے۔ اس متنازعہ تہوار کا آغاز ہر سال اکیس جون سے کیا جاتا ہے۔
ثقافت یا کاروبار؟
یولن کے مقامی افراد کا کہنا ہے کہ ’ڈاگ میٹ‘ سور کے گوشت سے مختلف نہیں ہے اور پھر موسم ِگرما میں اسے کھانا یولن کی روایت بھی ہے۔ تاہم جانوروں کے حقوق کے لیے کام کرنے والے اداروں کا کہنا ہے کہ اس تہوار میں کوئی ثقافتی رنگ نہیں بلکہ اس کے ذریعے محض کاروبار چمکایا جاتا ہے۔
تہوار کے خلاف مظاہرے
کتوں کی بڑے پیمانے پر ہلاکتوں کے خلاف عالمی سطح پر تنقید میں اضافہ ہوا ہے۔ چینی شہر یولن میں اس تہوار کے انعقاد کے خلاف امریکی ریاست لاس اینجلس میں چینی سفارت خانے کے سامنے جانوروں کے حقوق کے لیے سرگرم تنظیموں نے مظاہرہ کیا۔
کتوں کی حفاظت
کتوں کو بچانے کے لیے کبھی کبھار جانوروں کے حقوق کے کارکنان انہیں خرید بھی لیتے ہیں۔ اس تصویر میں نظر آنے والے کتے ایسے ہی کارکنان نے گوشت کے ڈیلروں سے خرید کر اس عارضی پناہ گاہ میں رکھ چھوڑے ہیں۔
حکومتی پابندی
سن 2015 میں یولن حکومت نے اس تہوار سے خود کو الگ کرتے ہوئے کچھ پابندیوں کا اعلان کیا تھا۔ لیکن چین میں کتے کا گوشت کھانے کے خلاف کوئی قانون نہیں ہے۔ اس تصویر میں گوشت کے ڈیلر ایک مارکیٹ میں کتے کا گوشت فروخت کر رہے ہیں۔
سالانہ دس ملین کتوں کی ہلاکت
واشنگٹن میں قائم ہیومن سوسائٹی کے مطابق چین میں گوشت کے لیے سالانہ دس ملین کتوں کو ہلاک کیا جاتا ہے۔ ان میں سے دس ہزار کتے صرف یولن فیسٹیول کی نذر ہو جاتے ہیں۔
’کتے اور سور کا گوشت ایک جیسا‘
یولن کے ایک رہائشی لی یونگوی نے خبر رساں ادارے اے ایف پی کو بتایا کہ کتے کے گوشت کا ذائقہ بھی سور کے گوشت کی طرح ہی ہوتا ہے۔ ایک اور رہائشی کا کہنا تھا،’’ یہ تہوار جاری رہے گا۔ بڑے ، بوڑھے حتیٰ کہ بچے بھی کتے کا گوشت کھاتے ہیں۔ یہ ہماری روایت ہے۔‘‘
ایشیا میں مقبول ڈِش
کتے کا گوشت چند دیگر ایشیائی ممالک میں ایک مقبول ڈِش ہے۔ ویت نام میں اسے جنسی قوت بڑھانے کا ذریعہ سمجھا جاتا ہے۔ ایک تخمینے کے مطابق ایشیا بھر میں سالانہ تیس ملین کتوں کا گوشت کھایا جاتا ہے۔