چین کا ایک ارب پتی قانونی شکنجے میں

جمعے کو موصول ہونے والی اطلاعات کے مطابق چین کی بڑی نجی کمپنیوں کے گروپ فوسن میں شامل تمام کمپنیوں کے حصص کو معطل کر دیا گیا ہے اور اس جائنٹ گروپ کے چیئر مین گواو گوانگ چانگ کو بدعنوانی کے الزامات کے تحت انکوائری کے لیے پولیس نے جمعرات کو شنگھائی ایئر پورٹ سے حراست میں لیا تھا۔ چین کی ایک بزنس میگزین Caixin کے رپورٹر نے سوشل میڈیا پر پوسٹ کیے جانے والے پیغامات کے حوالے سے بتایا کہ گوانگ چانگ کو شنگھائی ایئر پورٹ سے حراست میں لیا گیا ہے تاہم اُس نے یہ نہیں کہا کہ وہ خود کسی تفتیشی کارروائی کا نشانہ بنے ہوئے ہیں یا وہ کسی چھان بین کی کارروائی میں معاونت کر رہے ہیں۔

اُدھر چین کی سرکاری نیوز ایجنسی شنہوا کی رپورٹوں میں کہا گیا ہے کہ،’’ بہت سے لوگ گوانگ چانگ کے لاپتہ ہونے کو حکام کی طرف سے چھان بین کے تناظر میں دیکھ رہے ہیں‘‘۔

اقتدار میں آنے کے بعد سے چینی صدر شی جن پنگ نے کرپشن کے خلاف انسداد دہشت گردی کی ایک وسیع مہم شروع کر رکھی ہے۔ اس کے تحت ملک کی کئی نامور شخصیات قانون کے دائرے میں لائی جا چکی ہیں۔ ان میں سابق سکیورٹی چیف ژو یانگ کانگ سمیت بہت سے اہم نام ہیں۔ کئی ایک کو سخت تفتیشی عمل کا سامنا ہے۔

کرپشن کو کنٹرول کرنے کا یہ عمل ابھی تک حکمران کمیونسٹ پارٹی کے اندر تک محدود ہے۔ اس لیے ناقدین کا کہنا ہے کہ اس کا بنیادی مقصد پارٹی کے اندرونی حریف دھڑوں کی جنگ ہے اور طاقتور طبقہ اِسے بطور ہتھیار استعمال کر رہا ہے۔

اس طرح اگر گو او گوانگ چانگ کرپشن کے خلاف چھان بین کے اس سلسلے میں قانونی گرفت میں آ جاتے ہیں تو وہ چین کے پہلے انتہائی بڑے تاجر ہوں گے جو کرپشن کے سبب قانون کی جکڑ میں آئیں گے۔

چینی حکام نے اس سال کے اوائل میں مالیاتی سیکٹر میں بھی کرپشن کے خلاف وسیع پیمانے پر چھان بین کی مہم چلائی تھی، جس کی بنیادی وجہ مالیاتی منڈی میں قرضوں کے روز بروز پھولتے ہوئے غبارے کا پھٹنا تھا۔ اس رجحان کی بھی حکام کی طرف سے حوصلہ افزائی کی گئی تھی۔

فوسن گروپ چین کی نجی کاروباری کمپنیوں کا سب سے بڑا اشتراک ہے جسے فوسن انٹرنیشنل کے نام سے جانا جاتا ہے۔ اس کے 50 ارب یوآن ($ 7.8 بلین ڈالر) کے خالص اثاثہ جات ہیں۔ یہ کمپنی یورپ اور شمالی امریکا میں جائیداد، خزانہ، دواسازی، اسٹیل اور تفریحی اشیاء کی صنعت ​​کے قدرے کمزور اثاثے انتہائی تیز رفتاری سے خریدنے سے گریز نہیں کرتی۔ بلومبرگ نیوز کے مطابق گواو گوانگ چانگ 5.6 ارب ڈالر کی مجموعی مالیت کے ساتھ چین کی 17 ویں سب سے امیر شخص ہیں۔