’پاکستان کے لیے جاسوسی‘، بھارتی فضائیہ کا سابق اہلکار گرفتار

فرانسیسی خبر رساں ایجنسی اے ایف پی کی ایک رپورٹ کے مطابق پاکستان کی خفیہ ایجنسی آئی ایس آئی نے ایک خاتون کا سہارا لیتے ہوئے رنجیت کے کے نامی بھارتی افسر کو اپنے جال میں پھنسایا۔

نئی دہلی پولیس کے جوائنٹ کمشنر آف کرائم روندر یادیو نے اس حوالے سے اپنے ایک بیان میں کہا، ’’رانجیت کے کے نے اعتراف کیا ہے کہ اس نے بھارت کی فضائیہ کی ایک حالیہ مشق، طیاروں کی نقل و حرکت اور فضائیہ کی مختلف یونٹس کی تعیناتی سے متعلق معلومات فراہم کی ہیں۔‘‘

انڈین ایئرفورس کے اس سابق افسر کی حراست کا یہ واقعہ بھارتی وزیراعظم نریندر مودی کے دورہ پاکستان کے چند دن بعد سامنے آیا ہے۔ دونوں ایٹمی طاقتیں اکثر ایک دوسرے پر جاسوسی کے الزامات عائد کرتی رہتی ہیں۔

بھارتی پولیس کے مطابق پاکستانی خفیہ ایجنسی آئی ایس آئی نے رنجیت کو پھانسنے کے لیے ایک خاتون کا سہارا لیا۔ یادیو کے مطابق، ’’اب تک کی تحقیقات سے اس بات کا اندازہ لگایا گیا ہے کہ اس شخص کو سرحد پار جاسوسوں کی طرف سے بے وقوف بنایا گیا ہے۔‘‘

1947 میں برطانیہ سے آزادی حاصل کرنے کے بعد دونوں ممالک اب تک تین جنگیں لڑ چکے ہیں۔ پاکستان اور بھارت کے درمیان اب تک امن مذاکرات کامیاب نہیں ہو پائے اوراب بھی کشمیر کے متنازعہ علاقے میں آئے دن پر تشدد واقعات ہوتے رہتے ہیں۔