ویلنگٹن ٹیسٹ: پہلے روز نیوزی لینڈ چھ وکٹوں پر 246 رنز
15 جنوری 2011
نیوزی لینڈ نے ٹاس جیت کر پہلے بیٹنگ کا فیصلہ کیا اور پاکستان کو پہلی کامیابی اس وقت ملی جب میزبان ٹیم کے اوپننگ بیٹسمین میک کلم صرف دو رنز بنا کر پہلے ہی اوور کی آخری گیند پر عمر گل کی گیند پر کیچ آؤٹ ہو گئے۔
نیوزی لینڈ کی دوسری وکٹ 46 کے مجموعی اسکور پر گری جب ویلیمسن عمر گل ہی کی گیند پر عدنان اکمل کے ہاتھوں کیچ آؤٹ ہو گئے۔ اس کے بعد پاکستان کو یکے بعد دیگرے دو کامیابیاں ملیں اور نیوزی لینڈ کی تیسری اور چوتھی وکٹ 98 کے مجموعی اسکور پر گری۔
پہلے دن کے سب سے کامیاب بیٹسمین ٹیلر رہے، جنہوں نے78 رنز بنائے اور وہاب ریاض کی گیند پر وہ بھی عدنان اکمل کے ہاتھوں کیچ آؤٹ ہوئے۔ میچ کے پہلے روز ٹیلر آؤٹ ہونے والے نیوزی لینڈ کے آخری کھلاڑی تھے، جن کے بعد ابھی تک وکٹ کیپر ینگ 28 اور کپتان ویتوری 38 کے ذاتی اسکور پر کھیل رہے ہیں اور آؤٹ نہیں ہوئے۔
پاکستان کی طرف سے عمر گل نے 53 رنز اور تنویر احمد نے 63 رنز دے کر دو دو وکٹیں حاصل کیں۔ وہاب ریاض اور عبد الرحمان نے ایک ایک کھلاڑی کو آؤٹ کیا۔
ویلنگٹن کے بیسن ریزرو گراؤنڈ پر دوسرے ٹیسٹ کے پہلے دن کی خاص بات پاکستانی وکٹ کیپر عدنان اکمل کی کارکردگی تھی، جنہوں نے میزبان ٹیم کے آؤٹ ہونے والے کل چھ کھلاڑیوں میں سے پانچ کو وکٹوں کے پیچھے کیچ آؤٹ کیا۔
رپورٹ: مقبول ملک
ادارت: عصمت جبیں