نیٹو 40 فی صد شہری ہلاکتوں کے لئے ذمہ دار: رپورٹ

اقوام متحدہ کی ایک رپورٹ میں عسکریت پسندوں کو 55 فی صد جبکہ اتحادی اور افغان فورسز کو تقریباً 40 فی صد شہری ہلاکتوں کے لئے ذمہ دار ٹھہرایا گیا ہے۔

افغانستان میں اقوام متحدہ کے مشن کے مطابق امریکہ اور اس کے اتحادیوں کی طرف سے افغان عسکریت پسندوں کے مبینہ ٹھکانوں پر کئے جانے والے فضائی حملوں میں اکثر عام شہری نشانہ بنتے ہیں۔ ہلاک شدگان کی بڑی تعداد بچّوں اور خواتین کی ہوتی ہے۔

رپورٹ میں کہا گیا کہ طالبان عسکریت پسندوں کے خودکش حملوں اور سڑک کے کنارے نصب کئے جانے والے بموں کے نتیجے میں اکثر افغان شہری مارے جاتے ہیں۔ دو ہزار آٹھ کے دوران باغیوں کے ایسے حملوں میں تقریباً بارہ سو افغان شہری ہلاک ہوئے ہیں۔ رپورٹ کے مطابق اسی عرصے کے دوران اتحادی افواج کے فضائی حملوں میں لگ بھگ ساڑھے آٹھ سو افغان شہری جاں بحق ہوئے ہیں۔

اتحادی فوج اور طالبان کے درمیان لڑائی میں 38 امدادی کارکن بھی ہلاک ہوئے جبکہ اس دوران تقریباً 150 کارکن اغوا کئے گئے۔

اقوام متحدہ نے اپنی اس رپورٹ میں فریقین پر زور دیا ہے کہ وہ لڑائی کے دوران عام شہریوں کی حفاظت کو یقینی بنانے کے لئے تمام تر ضروری اقدامات اُٹھائیں۔

یہ رپورٹ اقوام متحدہ کے افغان مشن کے حقوق انسانی یونٹ نے مرتب کی ہے۔ غیر جانبدار اور آزاد مبصرین نے یہ رپورٹ مرتب کرنے سے پہلے ایسے بہت سے واقعات کی چھان بین اور تحقیقات کی ہیں جن میں عام شہریوں کی موت واقع ہوئی ہے۔

افغانستان میں اسی سال صدارتی انتخابات ہورہے ہیں اور شاید اسی وجہ سے صدر حامد کرذئی امریکہ پر زور دے رہے ہیں کہ اسے عسکریت پسندوں پر حملوں کے وقت شہریوں، بالخصوص بچّوں اور خواتین، کی حفاظت کا خاص خیال رکھنا چاہیے۔ تجزیہ کاروں کی رائے میں افغان صدر کے ایسے بیانات کی ٹائمنگ بڑی اہم ہے کیوں کہ انتخابات سے قبل وہ ضرور اپنے ووٹروں کو خوش کرنا چاہتے ہیں۔ بعض تجزیہ کار کہتے ہیں کہ اگر حامد کرذئی کو اپنے شہریوں کی ہلاکت کا اتنا ہی دُکھ ہے تو وہ کیوں کر افغانستان میں مزید امریکی فوجیوں کی تعیناتی کے مطالبات کررہے ہیں۔ افغان صدر حامد کرذئی اور ان کی حکومت پر بدعنوانی کے سنگین الزامات ہیں اور ملک میں اُن کی مقبولیت میں زبردست کمی واقع ہوئی ہے۔