نیویارک: تیز رفتار کار فٹ پاتھ پر چڑھ گئی، ایک ہلاک بیس زخمی

امریکی شہر نیویارک کے سکیورٹی حکام نے حادثے کے علاقے کا مکمل محاصرہ کر کے تفتیشی عمل شروع کر دیا ہے۔ ابھی تک اس کا تعین نہیں ہو سکا ہے کہ گاڑی فٹ پاتھ پر چڑھانے کا عمل دانستہ تھا یا غیر دانستہ۔ شہری انتظامیہ یا پولیس حکام کی جانب سے ابھی تک کوئی واضح بیان جاری نہیں کیا گیا لیکن حکام کے مطابق سکیورٹی اور خفیہ اداروں کے اہلکار دہشت گردی کے امکان کو رد نہیں کر رہے۔ پولیس کے ایک ترجمان نے نیوز ایجنسی اے ایف پی کو صرف اتنا بتایا ہے کہ بظاہر یہ ایک کار حادثہ محسوس ہوتا ہے۔

نیوز ایجنسی روئٹرز کے مطابق جس جگہ فٹ پاتھ پر موٹرگاڑی نے پیدل چلنے والوں کو نشانہ بنایا وہاں لوگوں کے بکھرے ہوئے جوتے اور خون کے دھبے دیکھے گئے ہیں۔ زخمی ہونے والے بیس افراد کو فوری طبی امداد کے لیے ہسپتال منتقل کر دیا گیا ہے۔ جائے حادثہ پر پولیس کی ایک بڑی تعداد، ایمبولینسیں اور محکمہ فائر بریگیڈ کا عملہ بھی پہنچ چکا ہے۔

 سرخ رنگ کی گاڑی میں سے ڈرائیور کو نکال لیا گیا ہے اور مقامی میڈیا کے مطابق اُسے پولیس نے اپنی حراست میں لے لیا ہے۔ پولیس نے اُس کا الکوحل ٹیسٹ بھی لیا ہے۔ عینی شاہدین کے مطابق موٹر کار انتہائی تیز رفتاری کے ساتھ چلائی جا رہی تھی۔

نیویارک سٹی میں ٹائمز اسکوائر سیاحوں کا ایک پسندیدہ مقام تصور کیا جاتا ہے۔ اس جگہ کئی شاپنگ مالز بھی ہیں اور یہ سیاحوں کی خریداری کی من پسند جگہ بھی ہے۔ ٹائمز اسکوائر نیویارک شہر کے مصروف علاقے مین ہٹن کے تھیئٹرز ڈسٹرکٹ کے قرب میں واقع ہے۔