میکسیکو میں ایک سابقہ کان سے 55لاشیں برآمد

گیریرو نامی صوبے میں واقع چاندی کی اس کان میں پہلی مرتبہ مئی کے مہینے میں انسانی باقیات ملی تھیں۔ ابتدائی تحقیقات کے مطابق پولیس نے کہا ہے کہ اس کان میں لاشیں پھینکنے کا سلسلہ ایک لمبے عرصے تک جاری رہا ہے۔ ابھی تک صرف چھ لاشوں کی شناخت ممکن ہو سکی ہے، جن میں سے ایک لاش مقامی جیل کے ایک ڈائریکٹرکی ہے۔

مقامی پولیس نے کہا ہے کہ وہ علاقے میں موجود دیگر کانوں کی بھی تلاشی لے رہیں ہیں تاکہ معلوم کیا جاسکے کہ کہیں کسی دوسری کان میں بھی لاشوں کو پھینکا گیا ہے یا نہیں۔

مقامی پولیس اور دیگرامددی عملہ لاشوں کو نکالنے کے لئے انتہائی جدید آلے استعمال کر رہے ہیں۔ اسی دوران وہ تصویریں اورڈی این اے نمونے بھی لیتے جا رہے ہیں تاکہ ان کی شناخت ممکن بنائی جا سکے۔

پولیس کے مطابق کچھ لاشوں پر مخصوص ٹیٹو ’نشانات‘ پائے گئے ہیں جن سے معلوم ہوتا ہے کہ وہ منشیات کے اسمگلروں کےایک مخصوص گروہ کا حصہ تھے۔ اطلاعات کے مطابق اس قدر زیادہ لاشوں کے برآمد ہونے کے نتیجے میں علاقے میں قائم مردہ خانوں میں جگہ تھوڑی پر گئی ہے۔

گیریرو منشیات اسمگلروں کا گڑھ سمجھا جاتا ہے اور یہاں پرتشدد واقعات کا ایک تسلسل دیکھنے میں آتا ہے۔ میکسیکو میں سن دو ہزار چھ سے لے کر اب تک کوئی بائیس ہزار افراد ایسے پرتشدد واقعات کی نذر ہو چکے ہیں۔

رپورٹ: عاطف بلوچ

ادارت: عدنان اسحاق