1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

مہاجرین مخالف پالیسی: ’ہنگری کو یورپی یونین سے نکالا جائے‘

13 ستمبر 2016

لکسمبرگ کے وزیر خارجہ ژاں ایسل بورن نے کہا ہے کہ ہنگری کی مہاجرین مخالف پالیسیوں کی بناء پر اُسے مستقل نہیں تو کم از کم عارضی طور پر یورپی یونین سے نکال دیا جانا چاہیے۔

https://p.dw.com/p/1K14k
Luxemburg Außenminister Jean Asselborn
لکسمبرگ کے وزیر خارجہ ژاں ایسل بورنتصویر: Getty Images/AFP/J. Thys

ایسل بورن نے یہ باتیں منگل تیرہ ستمبر کو جرمن اخبار ’دی وَیلٹ‘ سے گفتگو میں کہیں۔ ایسل بورن نے کہا: ’’ہمارے لیے یہ بات ناقابلِ قبول ہے کہ یورپی یونین کی بنیادی اَقدار کو اِس بُری طرح سے پامال کیا جائے۔‘‘

ایسل بورن کا سخت الفاظ پر مشتمل یہ بیان ایک ایسے وقت پر سامنے آیا ہے، جب سلوواکیہ کے دارالحکومت براتسلاوا میں یورپی یونین کی سربراہ کانفرنس کے انعقاد میں محض چند دن ہی باقی رہ گئے ہیں۔

ایسل بورن نے مزید کہا: ’’ہنگری کی طرح کا کوئی بھی ملک، جو جنگ سے تنگ آ کر فرار ہونے والے مہاجرین کو روکنے کے لیے باڑیں تعمیر کرتا ہے یا پریس اور عدالتی نظام کی آزادی کو پامال کرتا ہے، اُسے اگر مستقل نہیں تو عارضی طور پر یورپی یونین سے خار ج کر دیا جانا چاہیے۔‘‘

ہنگری کے وزیر اعظم وکٹور اوربان کی مہاجرین کی جانب سخت بیان بازی اور اُنہیں اپنی سرزمین سے دور رکھنے کے لیے جنوبی سرحدوں پر باڑیں تعمیر کرنے جیسی سخت پالیسیوں کی وجہ سے یورپی یونین کے ساتھی رکن ممالک آج کل اُن سے بہت نالاں ہیں۔

اوربان کے احکامات کے تحت آئندہ مہینے ہنگری میں ایک ریفرنڈم بھی منعقد ہونے والا ہے، جس میں اوربان نے ہنگری کے عوام پر یورپی یونین کے اُس کوٹہ سسٹم کے خلاف ووٹ ڈالنے کے لیے کہا ہے، جس کا مقصد یونین کے مختلف رکن ملکوں کو مہاجرین کی ایک مخصوص تعداد کو اپنے ہاں قبول کرنے کا پابند بنانا ہے۔

ایسل بورن نے کہا کہ یورپی یونین کو اس طرح کا طرزِ عمل برداشت نہیں کرنا چاہیے اور یہ کہ ’یورپی یونین کی سالمیت اور اَقدار کو بچانے کا واحد راستہ‘ ایسے کسی ملک کا یونین سے اخراج ہے۔ انہوں نے کہا کہ اس سلسلے میں قواعد و ضوابط میں ایسی تبدیلی کافی مددگار ثابت ہو گی، جس کے تحت کسی ملک کی رکنیت اتفاقِ رائے سے کیے گئے کسی فیصلے کے بغیر بھی معطل کی جا سکتی ہو۔

Grenze Ungarn - Serbien - Flüchtlinge
’’ہنگری مہاجرین کو اپنی سرزمین سے دور رکھنے کے لیے جو باڑ بنا رہا ہے، وہ لمبی سے لمبی، بلند سے بلند اور خطرناک سے خطرناک ہوتی چلی جا رہی ہے‘‘تصویر: picture-alliance/dpa/Z. Gergely Kelemen

ایسل بورن کے مطابق جنگ سے بچنے کے لیے گھر بار چھوڑ کر بھاگنے والے انسانوں کے ساتھ ہنگری میں جنگلی جانوروں سے بھی بدتر سلوک کیا جا رہا ہے: ’’ہنگری مہاجرین کو اپنی سرزمین سے دور رکھنے کے لیے جو باڑ بنا رہا ہے، وہ لمبی سے لمبی، بلند سے بلند اور خطرناک سے خطرناک ہوتی چلی جا رہی ہے۔ ہنگری اب اس اقدام سے زیادہ دُور نہیں رہ گیا کہ وہاں مہاجرین کو دیکھتے ہی گولی مارنے کا حکم دے دیا جائے۔‘‘

اُدھر ہنگری کے وزیر خارجہ پیٹر سِیارتو نے ایسل بورن کو ایک ’غیر سنجیدہ شخصیت‘ قرار دیتے ہوئے اُن کے بیان کو رَد کر دیا ہے۔

اس موضوع سے متعلق مزید سیکشن پر جائیں

اس موضوع سے متعلق مزید