’ملا رسول کی گرفتاری پروپیگنڈا ہے‘

طالبان کے منحرف دھڑے کے نائب سربراہ ملا عبدالمنان نیازی نے واضح طور پر کہا ہے کہ اُن کے لیڈر کی گرفتاری کی خبریں دشمنوں کا پروپیگنڈا ہے۔ نیازی کے مطابق ملا محمد رسول افغانستان میں آزادانہ طور پر مقیم ہیں اور اپنے فائٹرز کی قیادت کا فریضہ احسن طریقے سے سرانجام دے رہے ہیں۔ اِس تردیدی بیان میں ملا رسول کے نائب اور دستِ راست نے یہ بھی کہا کہ طالبان کے جس دھڑے کے ساتھ وہ وابستہ ہیں، اُس کا انحصار صرف ایک لیڈر پر نہیں ہے۔ دوسری جانب پاکستان کی سکیورٹی ایجنسیوں نے بھی ملا محمد رسول کی گرفتاری پر لاعلمی کا اظہار کیا ہے۔

طالبان کے تین اہم رہنماؤں نے گزشتہ ایام میں یہ بیان دیا تھا کہ کہ منحرف ٹولے کے سربراہ ملا محمد رسول کو پاکستانی صوبے بلوچستان اور افغانستان کی سرحد پر پاکستانی حکام نے پابند کر دیا ہے۔ ملا محمد رسول نے گزشتہ برس طالبان کی قیادت سنبھالنے والے ملا محمد منصور کی قیادت کو چیلنج کرتے ہوئے مرکزی دھڑے سے اپنے حامیوں سمیت علیحدگی اختیار کر لی تھی۔ پاکستان کے اخبار ایکسپریس ٹریبیون نے بھی رسول کی گرفتاری کو پاکستانی حکام کے حوالے سے رپورٹ کیا ہے۔ اخبار کے مطابق منحرف دھڑے کے سربراہ افغانستان سے فرار ہو کر پاکستان داخل ہو رہے تھے کہ دھر لیے گئے۔

طالبان کے منحرف دھڑے کے سربراہ کے بارے میں بتایا گیا ہے کہ وہ افغانستان میں آپس کی مسلح جھڑپوں میں شدت پیدا ہونے کے بعد پاکستانی صوبے بلوچستان میں اپنے حامیوں کے ساتھ داخل ہو کر پناہ لینے کے متمنی تھے۔ اِس مناسبت سے نیوز ایجنسی روئٹرز نے طالبان کے تین اہم رہنماؤں کے حوالے سے اِس گرفتاری کو رپورٹ کیا تھا مگر ملا محمد رسول کے نائب ملا عبدالمنان نیازی نے اِس کی پرزور الفاظ تردید ضرور کی ہے۔ مبصرین کا خیال ہے کہ منحرف لیڈر کی گرفتاری اور اِس کی تردید سے افغانستان میں جاری طالبان کی تحریک پر منفی اثر مرتب ہو گا کیونکہ پہلے ہی اِس کی اندرونی تقسیم نے اِس کی قیادت کے مسئلے کو انتہائی پیچیدہ کیا ہوا ہے۔

یہ بھی کہا جاتا ہے کہ ملا محمد رسول علیحدگی اختیار کرنے کے بعد مغربی شہر ہرات کے گردونواح میں روپوش رہے ہیں اور انہوں نے دو چار ہفتے قبل پاکستان منتقل ہونے کا فیصلہ کیا تھا۔ پاکستان کے دو سینیئر سکیورٹی اہلکاروں نے ملا رسول کو حراست میں لینے کی تردید کی ہے۔ دوسری جانب افغانستان میں یہ تاثر عام ہے کہ ملا محمد رسول طالبان کے موجودہ لیڈر ملا محمد منصور کے سب سے بااثر اور طاقتور ہیں۔ ملا عمر کی رحلت کی خبر عام ہونے کے بعد طالبان کی قیادت کے معاملے میں اختلافات ضرور ابھرے لیکن ملا محمد منصور اور اُن کے ساتھیوں نے کئی اختلاف کرنے والوں کو قائل کر کے اپنے ساتھ شامل کر لیا ہے۔ ان میں سب سے نمایاں ملا عمر کے بھائی اور بیٹے ہیں۔