مغربی یورپ اور برطانیہ میں برفانی طوفان، پانچ افراد ہلاک

اس طوفانی برف باری کا سب زیادہ شکار بنے والا ملک برطانیہ ہے جہاں ملک بھر میں اسکول، دفاتر، ہوائی اڈے اور دیگر معمولات زندگی بری طرح متاثر ہوئے ہیں۔ پیر کے دن سے جاری برف باری کی اس شدید لہر سے سینکڑوں پروازیں تاخیر کا شکار ہوئیں اور درجنوں کو منسوخ کیا گیا۔

اٹلی میں طوفانی بارشوں اور برف باری سے تین افراد ہلاک ہوئے جب کہ دیگر پانچ سو افراد کو ان کے گھروں سے محفوظ مقامات پر منتقل کردیا گیا۔ فرانس کے دارالحکومت پیرس کے ہوائی اڈے پر تقریبا 87 پروازیں منسوخ کی گئیں جب کہ درجنوں تاخیر کا شکار ہوئیں۔

اسپین میں بھی موسم سرما کی ان طوفانی بارشوں اور برف باری نے ذرائع آمد رفت کو متاثر کیا ہے اور میڈرڈ شہر کی دو بڑی ہائی ویز بندش کا شکار ہو گئی۔

سوئٹزر لینڈ کے کئی علاقے بھی شدید برف باری کا شکار ہوئے ہیں جہاں 20 سینٹی میٹر تک برف ریکارڈ کی گئی جب کہ بیلجئیم میں برف باری سے صبح کے اوقات میں برسلز اور گردو نواح میں چار سو کلو میٹر علاقے پر ٹریفک تعطل کا شکار دکھائی دیا۔

جنوب مشرقی برطانیہ میں پیر کے روز برف باری سے تقریبا معطل ہو جانے والے ذرائع آمدورفت کو ایک روز بعد ہی دوبارہ قابل استعمال بنا دیا گیا اور لوگ اپنے دفاتر جا سکے مگر تعلمیمی ادارے دوسرے روز بھی بند رہے۔

جنوبی انگلستان میں پیر کے روز پڑنے والی برف نے گزشتہ ایک دہائی سے زائد عرصے کے تمام ریکارڈ توڑ دئیے۔

ماہرین کے مطابق اس برف باری سے چھ ملین سے زائد افراد اپنی روز گار کی جگہوں تک نہ پہنچ سکے۔ ماہرین کا خیال ہے کہ اس برف باری سے معمولات زندگی اور کاروباری سرگرمیوں کے متاثر ہونے کی وجہ سے پہلے سے ہی کساد بازاری کی شکار برطانوی معیشت کو دو روز میں تقریبا ایک اعشاریہ تین بلین پاؤنڈ کا نقصان اٹھانا پڑا۔

چھوٹے تاجروں اورکاروباری اداروں کی فیڈریشن کے نمائندے Stephen Alambritis کے مطابق اس ہفتے ملک بھر میں چھوٹی صنعتوں کو 3.3 بلین پاؤنڈ زکا نقصان ہوا۔ ان کا کہنا تھا کہ دنیا کہ بڑی معیشتوں میں سے ایک برطانیہ کو ایسے حالات کے لئے پہلے سے تیار رہنا چاہئےتھا۔

لندن کے ہیتھرو ائیر پورٹ سمیت برطانیہ کے کئی دیگر ائیر پورٹ بھی اب کھلے تو ہیں مگر پروازیں تاخیر کا شکار ہیں یا منسوخ کی جا رہی ہیں۔ برطانوی دارالحکومت لندن میں سڑکیں ویران و سنسان دکھائی دے رہی ہیں اور زیر زمین ٹرین سروس دو روز سے معطل ہے تاہم کچھ دیگر اضلاع میں اندرون شہر چلنے والی سٹی ٹرام سروس جزوی طور پر کام کر رہی ہے۔